Volkswagen-ი, Audi და Seat გერმანიაში სულ მცირე 950 ათას ავტომობილს იწვევენ უკან. მიზეზი საჭის მართვის სისტემაში არსებული დეფექტური ჭანჭიკია, რომელიც კოროზიის გამო შესაძლოა გატყდეს და მძღოლმა ავტომობილზე კონტროლი დაკარგოს.
საჭის მართვის სისტემაში არსებული დეფექტური ჭანჭიკის გამო, გერმანიაში თითქმის მილიონ ავტომობილს საჭის მექანიზმის მწყობრიდან გამოსვლის საფრთხე ემუქრება. ამის გამო გერმანული კონცერნი Volkswagen-ი და მისი შვილობილი კომპანიები, Audi და Seat, რამდენიმე მოდელის სულ მცირე 950 ათას ავტომობილს სერვისცენტრებში იწვევენ. მათ შორისაა Golf, Tiguan, Touran და Q3. ამის შესახებ პარასკევს, 25 სექტემბერს, სააგენტო dpa გერმანიის საავტომობილო ტრანსპორტის ფედერალური უწყების (KBA) მონაცემებსა და Volkswagen-ისა და Audi-ს წარმომადგენლებზე დაყრდნობით იუწყება.
სერვისცენტრებში უნდა შემოწმდეს 2013 წლის სექტემბრიდან 2024 წლის ივლისამდე გამოშვებული VW Tiguan, Touran, Golf Variant, Golf Sportsvan და Caddy. მსოფლიოში ასეთი 2,16 მილიონი ავტომობილია. იგივე პრობლემა შესაძლოა ჰქონდეს 2017 წლის 31 ოქტომბრიდან 2024 წლის 23 მაისამდე წარმოებულ Audi Q3-საც. მსოფლიოში ამ მოდელის თითქმის 700 ათასი ავტომობილია, მათგან 58 555 — გერმანიაში.
უკან იწვევენ ასევე 2016 წლის აპრილიდან 2024 წლის სექტემბრამდე გამოშვებულ Seat Ateca-სა და Tarraco-ს. მათი რაოდენობა ზუსტდება. გერმანიის უწყების მონაცემთა ბაზაში ჯერ არ არის ინფორმაცია Volkswagen-ის ჯგუფის სხვა ბრენდების, მათ შორის Skoda-ს, ავტომობილების შესახებ, რომელთა სერვისცენტრებში გამოძახებაც შესაძლოა გახდეს საჭირო.
საჭის სამაგრი ჭანჭიკი კოროზიისადმი მგრძნობიარეა
„ხარისხის შიდა შემოწმებისას დადგინდა, რომ Volkswagen-ის სხვადასხვა სერიის გარკვეულ ავტომობილებს შესაძლოა საჭის მართვის სისტემასთან დაკავშირებული პრობლემა ჰქონდეთ“, — განუცხადა Volkswagen-ის წარმომადგენელმა სააგენტო dpa-ს.
გარემო პირობების ზემოქმედებისა და გზებზე დაყრილ მარილთან მრავალწლიანი კონტაქტის შედეგად საჭის სამაგრი დეტალი შესაძლოა დაჟანგდეს. ამის გამო ის შეიძლება გატყდეს და მძღოლმა ავტომობილზე კონტროლი დაკარგოს, განსაკუთრებით პარკირებისას ან დაბალ სიჩქარეზე მანევრირებისას. პრობლემის მოსაგვარებლად ჭანჭიკის გამოცვლაა საჭირო. ავტომფლობელებს სთავაზობენ, სერვისცენტრს მიმართონ უფასო შემოწმებისა და შეკეთებისთვის. პროცედურა ერთ საათზე ნაკლებს გასტანს.