„საერთაშორისო გამჭვირვალობა – საქართველო“ აცხადებს, რომ მიხეილ სააკაშვილი უნდა ჩაითვალოს პოლიტიკურ პატიმრად ევროსაბჭოს საპარლამენტო ასამბლეის რეზოლუციის მიერ დადგენილი კრიტერიუმების შესაბამისად.
არასამთავრობო ორგანიზაციამ 2026 წლის 21 ივლისს, საქმეების შესწავლის საფუძველზე, გამოაქვეყნა პოლიტიკური პატიმრების სია, რომელშიც სააკაშვილი არ ფიგურირებდა. მასში შეტანილი იქნენ ამჟამად პატიმრობაში მყოფი პირები, რომელთა დაკავება, ბრალდება და მსჯავრდება აშკარად უკავშირდებოდა 2024-2025 წლების საპროტესტო აქციებში ამა თუ იმ ფორმით მათ მონაწილეობას, მათ მიერ გამოხატვისა და შეკრების თავისუფლებებით სარგებლობას.
2026 წლის ივლისის ბოლოს „საერთაშორისო გამჭვირვალობა – საქართველოს“ ინფორმაციით, ორგანიზაციას დაუკავშირდა პატიმრობაში მყოფი მესამე პრეზიდენტის ადვოკატი და მიხეილ სააკაშვილის პოლიტიკური პატიმრის სტატუსის ქონის საკითხის შესასწავლად მიაწოდა ე.წ. “პიჯაკების”, საზღვრის კვეთის, ტელეკომპანია “იმედის” საქმეებზე სააკაშვილის საქმის მასალები.
„ამ მასალების შესწავლისა და ანალიზის საფუძველზე, ჩვენ მივედით დასკვნამდე, რომ მიტაცებული სახელმწიფო ინსტიტუტების პირობებში მიხეილ სააკაშვილის მიმართ უკვე პერმანენტულად ქცეული ბრალდების საქმეები არის პოლიტიკურად მოტივირებული, ხოლო მის მიმართ ე.წ. „პიჯაკების საქმეზე“ გამოტანილი გამამტყუნებელი განაჩენი არის დაუსაბუთებელი და უსამართლო, რის გამოც იგი უნდა ჩაითვალოს პოლიტიკურ პატიმრად ევროსაბჭოს საპარლამენტო ასამბლეის 1900 (2012) რეზოლუციის მიერ დადგენილი კრიტერიუმების შესაბამისად“ – წერს ორგანიზაცია და ვრცელ ანალიზს აქვეყნებს