დღეს, 9 ოქტომბერს, უკრაინული უპილოტო საფრენი აპარატებისა და მცირე საჰაერო ბუშტების იერიშის გამო მოსკოვის საჰაერო სივრცეში საგანგებო შეზღუდვები დაწესდა.
როსავიაციამ მოსკოვის ოთხივე აეროპორტში -შერემეტიევოში, ვნუკოვოში, დომოდედოვოსა და ჟუკოვსკში დროებითი შეზღუდვები გამოაცხადა, რამაც ასობით ფრენის დაყოვნება და გაუქმება გამოიწვია.
როგორც საერტაშორისო მედია წერს, ამ ფონზე, თურქმენეთში ოფიციალური ვიზიტის დასრულების შემდეგ მოსკოვისკენ მიმავალი ვლადიმერ პუტინის სამთავრობო თვითმფრინავების კორტეჟი იძულებული გახდა, მარშრუტი შეეცვალა ან მოლოდინის ზონაში დარჩენილიყო.
დამოუკიდებელი მედიასაშუალებები აღნიშნავენ, რომ Flightradar24-ის მონაცემებით, პრეზიდენტის სპეციალური საფრენი რაზმის „როსიას“ რამდენიმე სამთავრობო ბორტი მოსკოვის შემოგარენში მოლოდინის ზონაში ტრიალებდა და ნაწილი ალტერნატიულ აეროპორტებში გადაამისამართეს.
დამოუკიდებელი რუსული პროექტი Astra მოსკოვის სამხრეთ რაიონების მცხოვრებლებზე დაყრდნობით წერს, რომ დედაქალაქში აქტიურად მუშაობდნენ საჰაერო თავდაცვის სისტემები. თავდასხმა ხორციელდებოდა როგორც დრონებით, ისე სპეციალური მცირე ზომის საჰაერო ბუშტებით, რაც უკრაინის შეიარაღებული ძალების მიერ გამოყენებული ახალი ტაქტიკური საშუალებაა.
კრემლის ოფიციალური სტრუქტურები და სახელმწიფო სააგენტოები ადასტურებენ მოსკოვზე საჰაერო იერიშს, თუმცა ვლადიმერ პუტინის კორტეჟის მანევრებსა და რუსეთის პრეზიდენტის ამჟამინდელ ადგილსამყოფელზე დუმილს ინარჩუნებენ.