ოპერაცია „კართაგენის“ შესახებ ახალი დეტალების გამოქვეყნების შემდეგ უკრაინის პრეზიდენტმა ვოლოდიმირ ზელენსკიმ განაცხადა, რომ უკრაინის უსაფრთხოების სამსახურში საკადრო ცვლილებები იგეგმება. მანამდე გამოძიების ფარგლებში სამსახურის მაღალი თანამდებობის პირებთან ჩხრეკა ჩატარდა.
შაბათს, 7 ნოემბერს, ანტიკორუფციული ოპერაცია „კართაგენის“ შესახებ ახალი დეტალების გამოქვეყნების შემდეგ უკრაინის პრეზიდენტმა ვოლოდიმირ ზელენსკიმ უკრაინის უსაფრთხოების სამსახურში საკადრო ცვლილებები დააანონსა. მან ასევე მოიწონა კანონპროექტი, რომელიც სამსახურის ყველა თანამშრომელს შემოსავლებისა და ქონების დეკლარირებას კვლავ სავალდებულოს გაუხდის.
„ამ კვირაში, პირდაპირ უნდა ითქვას, უსიამოვნო, სამარცხვინო და სრულიად დაუშვებელი ამბები მოხდა“, — განაცხადა ზელენსკიმ. მისი თქმით, გამოძიებამ მომხდარის ყველა გარემოება უნდა დაადგინოს და დანაშაულისა და ძალადობის ყველა დამკვეთის დასჯა უზრუნველყოს. ზელენსკიმ განაცხადა, რომ უსაფრთხოების სამსახურში საკადრო გადაწყვეტილებებს უახლოეს მომავალში მიიღებენ.
ზელენსკის განმარტებით, შემოსავლებისა და ქონების სავალდებულო დეკლარირების აღდგენა შესაძლებელს გახდის უსაფრთხოების სამსახურის თანამშრომელთა ცხოვრების წესის შემოწმებას და მათთვის პასუხისმგებლობის დაკისრებას იმავე საფუძვლით, რაც სხვა სახელმწიფო უწყებების თანამშრომლებზე ვრცელდება. პრეზიდენტმა უმაღლესი რადის დეპუტატებს კანონპროექტის რაც შეიძლება მალე მიღებისკენ მოუწოდა.
ოპერაცია „კართაგენი“: ანტიკორუფციული ბიუროს ცნობით, დანაშაულებრივ ორგანიზაციაში უსაფრთხოების სამსახურის გენერალიც მონაწილეობდა
4 ნოემბერს უკრაინის ეროვნულმა ანტიკორუფციულმა ბიურომ და სპეციალიზებულმა ანტიკორუფციულმა პროკურატურამ სპეცოპერაცია „კართაგენის“ ფარგლებში უსაფრთხოების სამსახურისა და პოლიციის მაღალი თანამდებობის პირებთან ჩხრეკა ჩაატარეს. ხუთ ეჭვმიტანილს ბრალი წაუყენეს დანაშაულებრივი ორგანიზაციის საქმიანობაში მონაწილეობასთან დაკავშირებით.
გამოძიების მონაცემებით, დაჯგუფება, რომელსაც კავშირი ჰქონდა საერთაშორისო ნარკოკარტელ „ხიმპრომთან“, 50-ზე მეტ თაღლითურ ქოლცენტრსა და რამდენიმე უკანონო სათამაშო დაწესებულებას აკონტროლებდა. გამოძიების ცნობით, დაჯგუფება ყალბ სიგარეტსა და ევროს ყალბ ბანკნოტებსაც ამზადებდა, ადამიანებს იტაცებდა და ძალადობას მიმართავდა.
გამოძიების ვარაუდით, დაჯგუფების წევრები უსაფრთხოების სამსახურის, პოლიციისა და პროკურატურის თანამშრომლებს ქრთამს აძლევდნენ, რათა მათგან მფარველობა მიეღოთ და სისხლისსამართლებრივი დევისთვის თავი აერიდებინათ.
უკრაინის ანტიკორუფციული უწყებების ცნობით, სქემის ძირითადი მონაწილეები დააკავეს. მათ შორის არიან სერჰი დუკა, უსაფრთხოების სამსახურის ეროვნული სახელმწიფოებრიობის დაცვის დეპარტამენტის უფროსის პირველი მოადგილე, და ვოლოდიმირ ცენოვი, უკრაინის ეროვნული პოლიციის სტრატეგიული გამოძიებების დეპარტამენტის თანამდებობის პირი.
ზელენსკის თქმით, „ხიმპრომთან“ საბრძოლველად უკრაინას პარტნიორების მხარდაჭერა დასჭირდება
მოქალაქეებისადმი ყოველდღიურ ვიდეომიმართვაში უკრაინის პრეზიდენტმა აღიარა, რომ ნარკოკარტელ „ხიმპრომის“ საქმიანობის გამოსაძიებლად საერთაშორისო პარტნიორების მხარდაჭერაა საჭირო.
ზელენსკის თქმით, კარტელი უკვე მოქმედებს პოლონეთში და „ცდილობს, სინთეზური ნარკოტიკებით გერმანიის ბაზარზეც შევიდეს“. პრეზიდენტმა ასევე განაცხადა, რომ კიევი ამ საკითხზე სხვა ქვეყნებთან უკვე მართავს კონსულტაციებს.