მქადაგებელი პოლ მაკენზი 190 ბავშვისა და ერთი ზრდასრული ადამიანის მკვლელობაში დამნაშავედ ცნეს. ის თავის მიმდევრებს მოუწოდებდა, სიკვდილამდე ეშიმშილათ, რათა „იესოს შეხვედროდნენ“.
პარასკევს, 6 ნოემბერს, კენიის სასამართლომ მქადაგებელ პოლ მაკენზის 190 ბავშვისა და ერთი ზრდასრული ადამიანის მკვლელობისთვის 200 წლით თავისუფლების აღკვეთა მიუსაჯა.
მაკენზის ასევე წარედგინა ბრალდებები ტერორიზმისა და გაუფრთხილებლობით სიცოცხლის მოსპობის მუხლებით. ეს ბრალდებები კიდევ 200-ზე მეტი ადამიანის დაღუპვას უკავშირდება. სხვა სასამართლოები განიხილავენ საქმეებს, რომლებშიც მას ბავშვებისადმი სასტიკ მოპყრობასა და წამებაში ედება ბრალი.
2003 წელს მაკენზიმ „კეთილი უწყების საერთაშორისო ეკლესია“ დააარსა. ის მიმდევრებს აქეზებდა, სიკვდილამდე ეშიმშილათ, რათა „იესოს შეხვედროდნენ“.
მოსამართლის თქმით, 183 ადამიანი შიმშილით გარდაიცვალა, რვა კი მოკლეს
მოსამართლე დიანა კავეძამ განაცხადა, რომ „ძირითადი სისხლისსამართლებრივი პასუხისმგებლობა“ მაკენზის ეკისრება, რადგან მან თავისი მიმდევრები შორეულ ადგილას გადაასახლა და უბრძანა, სიკვდილამდე ემარხულათ.
განაჩენის გამოცხადებისას კავეძამ აღნიშნა, რომ 183 ადამიანი შიმშილით გარდაიცვალა, კიდევ რვა ადამიანის სიკვდილი კი სასამართლომ უშუალოდ მკვლელობად შეაფასა. მოსამართლემ ამ დანაშაულებს „ცივსისხლიანად და წინასწარი გათვლით ჩადენილი“ უწოდა.
სააგენტო Associated Press-ის ცნობით, განაჩენის გამოცხადებისას მაკენზი ხშირად იღიმოდა და თავის თანაშემწეს, პასტორ სმარტ მვაკალამას, ესაუბრებოდა. მვაკალამას 160 წლით თავისუფლების აღკვეთა მიუსაჯეს.
მსხვერპლთა რაოდენობა შესაძლოა 400-ს აღემატებოდეს
მქადაგებელი 2023 წლის აპრილში უფლებადამცველთა საჩივრების შემდეგ დააკავეს. კენიურმა მედიამ ამ საქმეს „შაკაჰოლას ტყის ხოცვა-ჟლეტა“ უწოდა. სექტის ზოგიერთი წევრის გადარჩენა მოხერხდა, თუმცა ტყეში არაერთი მასობრივი სამარხი აღმოაჩინეს.
გვამების გაკვეთამ აჩვენა, რომ ბავშვების უმეტესობა შიმშილით გარდაიცვალა. სიკვდილის მიზეზებს შორის ასევე იყო „ასფიქსია, კისერზე ზეწოლა და ქალა-ტვინის ტრავმები“. სექტის მსხვერპლთა საერთო რაოდენობა შესაძლოა 400-ს აღემატებოდეს.