ბიძინა ივანიშვილი „რეპორტიორები საზღვრებს გარეშე“-ს (RSF) პრესის თავისუფლების „მტაცებელთა“ (Press Freedom Predators) 2026 წლის სიაში მოხვდა. ავტორიტეტულმა საერთაშორისო ორგანიზაციამ სპეციალური ანგარიში 2 ნოემბერს, ჟურნალისტთა წინააღმდეგ ჩადენილი დანაშაულების დაუსჯელობის დასრულების საერთაშორისო დღესთან დაკავშირებით გამოაქვეყნა, რომელშიც იმ პირებსა თუ ორგანიზაციებს ასახელებს, ვინც მიმდინარე წლის განმავლობაში თავისუფალ მედიაზე ყველაზე სასტიკი იერიშები მიიტანა.
2026 წლის ანგარიშში ორგანიზაციამ 33 ასეთი „მტაცებელი“ გამოავლინა, რომლებიც 5 სხვადასხვა კატეგორიად (პოლიტიკური, უსაფრთხოების, სამართლებრივი, ეკონომიკური და სოციალური) დააჯგუფა.
ბიძინა ივანიშვილი სიის „ეკონომიკურ კატეგორიაში“ მოხვდა. RSF-ის განმარტებით, ამ კატეგორიაში ერთიანდებიან პირები, რომლებიც მედიის წინააღმდეგ იყენებენ ფინანსურ ზეწოლას, მიზანმიმართულად აზარალებენ დამოუკიდებელ გამოცემებს და უსპობენ მათ დაფინანსების წყაროებს.
ორგანიზაცია ხაზს უსვამს, რომ ივანიშვილი საკუთარ ბიზნესიმპერიას და გავლენის ქსელს მედიაგარემოზე კონტროლის დასამყარებლად იყენებს, ხოლო სახელმწიფო ინსტიტუტები და ეკონომიკური რესურსები დამოუკიდებელი მედიის ჩასახშობად არის მიმართული.
უშუალოდ ივანიშვილის პროფილში წერია:
- დამოუკიდებელი ჟურნალისტიკის წამყვანი ფიგურის, მზია ამაღლობელის პატიმრობის გაგრძელება, რომლის სააპელაციო საჩივარი უზენაესმა სასამართლომ უარყო, ხოლო ვადაზე ადრე გათავისუფლების შესახებ განცხადება არ დაკმაყოფილდა.
- ახალი რეპრესიული კანონების მიღება, რომლებიც უცხოური დაფინანსების გარკვეულ ფორმებს კრიმინალად აქცევს და საფრთხეს უქმნის დამოუკიდებელი მედიისა და მათი მხარდამჭერი არასამთავრობო ორგანიზაციების (NGO) გადარჩენას.
- მაუწყებლობის მარეგულირებლით მანიპულირება იმ ტელეარხების დასასანქცირებლად, რომლებიც ხელისუფლებას პასუხს სთხოვენ, კერძოდ — „ფორმულა“ და „ტვ პირველი“ , იქამდეც კი, რომ მათ აეკრძალათ ხელისუფლების მიმართ კრიტიკული გარკვეული გამოთქმების გამოყენება.
- ჟურნალისტების წინააღმდეგ მიმართული სამართლებრივი დევნისა და სანქციების მზარდი რაოდენობა, მათთვის საპარლამენტო აკრედიტაციის შეზღუდვასთან ერთად.
ანგარიშის მიხედვით, „მტაცებლების“ მეთოდები განსხვავებულია, თუმცა მიზანი ერთი აქვთ — გააჩუმონ კრიტიკული აზრი. 2026 წლის სიის სხვადასხვა კატეგორიებში ყველაზე თვალსაჩინო ფიგურები არიან:
• დონალდ ტრამპი: სიის ახალი წევრი „პოლიტიკურ“ კატეგორიაში. RSF-ის შეფასებით, მან თავისი მეორე საპრეზიდენტო ვადის პირველი ორი წლის განმავლობაში ჟურნალისტიკა პოლიტიკურ პროპაგანდამდე დაიყვანა.
• ვლადიმერ პუტინი და სი ძინპინი: ტრადიციული წევრები, რომლებიც მედიას მკაცრი ცენზურით, მკვლელობებითა და ჟურნალისტების მასობრივი დაპატიმრებებით ებრძვიან.
• ილონ მასკი და ხავიერ მილეი: „სოციალურ“ კატეგორიაში მოხვდნენ ციფრული თავდასხმების, მედიის დისკრედიტაციისა და ჟურნალისტების მიმართ საზოგადოებრივი სიძულვილის გაღვივების გამო.
RSF-ის გენერალური დირექტორის, ტიბო ბრუტენის განცხადებით, ამ სიის გამოქვეყნების მიზანია, რომ მედიაზე თავდასხმები ჩვეულებრივ, ნორმალურ მოვლენად არ იქცეს. ორგანიზაცია აგრძელებს იმ პირების დასახელებას, რომლებიც საფრთხეს უქმნიან საზოგადოების უფლებას – მიიღოს დამოუკიდებელი და გადამოწმებული ინფორმაცია.