უკრაინის პრეზიდენტმა ვოლოდიმირ ზელენსკიმ ტელეარხ CNN Türk-თან ინტერვიუში განაცხადა, რომ მზად არის რუსეთის ლიდერ ვლადიმირ პუტინთან შესაძლო შეხვედრისთვის თურქეთში, თუ თურქეთის პრეზიდენტი რეჯეფ თაიფ ერდოღანი მის ორგანიზებას შეძლებს.
„პირადად მე მიმაჩნია, რომ ჩვენი ურთიერთობა პრეზიდენტ [ერდოღანთან] და მისი პირადი ურთიერთობები ტრამპთან და პუტინთან შესაძლოა სასარგებლო აღმოჩნდეს. რა თქმა უნდა, თუ თურქეთი ამას შეძლებს, ჩვენ დავთანხმდებით და მხოლოდ გაგვიხარდება. დიახ, მზად ვართ, მზად ვართ თურქეთში ასეთი შეხვედრისთვის“, — თქვა ზელენსკიმ.
ზელენსკი 31 ოქტომბერს ანკარაში ერდოღანს შეხვდა და, უკრაინის პრეზიდენტის თქმით, სხვა საკითხებთან ერთად სამშვიდობო მოლაპარაკებების მიმდინარეობა და ასეთი შეხვედრის შესაძლებლობაც განიხილა.
ზელენსკიმ გაიმეორა, რომ მოლაპარაკებებზე უკრაინული მხარის დღის წესრიგის მთავარი საკითხი ცეცხლის უპირობო და სრული შეწყვეტა იქნება, რასაც მონიტორინგის ეფექტიანი მექანიზმის შექმნა უნდა მოჰყვეს. გარდა ამისა, სამშვიდობო მოლაპარაკებებზე უნდა გადაწყდეს უკრაინის უსაფრთხოების გარანტიებისა და ქვეყნის აღდგენის საკითხები.
რაც შეეხება ტერიტორიებს, ზელენსკიმ კვლავ ხაზგასმით აღნიშნა, რომ უკრაინა არც რუსეთის მიერ მიტაცებულ მიწებზე აპირებს დე იურე უარის თქმას და არც დონეცკის ოლქის დარჩენილი ნაწილის ნებაყოფლობით დათმობას.
ბოლო დროს პოლიტიკოსები და დიპლომატები, პირველ რიგში აშშ-დან, საუბრობდნენ პუტინისა და ზელენსკის შეხვედრის ორგანიზების თეორიულ შესაძლებლობაზე დეკემბერში, მაიამიში დაგეგმილ „დიდი ოცეულის“ სამიტზე. თუმცა ზელენსკიმ ინტერვიუში თქვა, რომ სამიტზე ოფიციალური მიწვევა ჯერ არ მიუღია. სახელმწიფო მდივანმა მარკო რუბიომ კი, მედიის ცნობით, G20-ის წევრი ქვეყნების საგარეო საქმეთა მინისტრების შეხვედრაზე განაცხადა, რომ ეჭვი ეპარება, პუტინი იქ ჩავიდეს.
რუბიოს კიდევ უფრო მეტად ეპარება ეჭვი, რომ უკრაინაში მშვიდობის მიღწევა უახლოეს პერიოდში გახდება შესაძლებელი.
„არ ვიცი, შესაძლებელია თუ არა უკრაინაში მშვიდობის მიღწევა მოლაპარაკებების გზით. სწორედ ამის გარკვევას ვცდილობთ. არა მგონია, აქ ვინმე ამტკიცებდეს, რომ მოლაპარაკებების გზით შეთანხმების მიღწევის ზღვარზე ვართ“, — აშშ-ის სახელმწიფო მდივნის სიტყვებს ციტირებს „რადიო თავისუფლება“ (რომელიც რუსეთში „არასასურველ ორგანიზაციად“ არის გამოცხადებული).