აშშ-ის სახელმწიფო მდივანმა მარკო რუბიომ უკრაინაში ომის მალე დასრულების შესაძლებლობის მიმართ ეჭვი გამოთქვა. ამის შესახებ მან შაბათს, 31 ოქტომბერს, ამერიკის ქალაქ ატლანტაში „დიდი ოცეულის“ (G20) საგარეო საქმეთა მინისტრების შეხვედრის შემდეგ გამართულ პრესკონფერენციაზე ერთ-ერთი კითხვის პასუხად განაცხადა.მისი თქმით, აშშ-ის ხელისუფლება არ მიიჩნევს, რომ ომი დასრულების ზღვარზეა.
„არ ვიცი, შესაძლებელია თუ არა უკრაინაში მშვიდობის მიღწევა მოლაპარაკებების გზით. სწორედ ამის გარკვევას ვცდილობთ. არ მგონია, აქ ვინმე ამტკიცებდეს, რომ მშვიდობიანი მოგვარების ზღურბლზე ვდგავართ“, — თქვა სახელმწიფო დეპარტამენტის ხელმძღვანელმა.
რუბიოს განცხადებას წინ უძღოდა აშშ-ის პრეზიდენტ დონალდ ტრამპის მორიგი განცხადება, რომ უკრაინის საკითხზე შეთანხმება ახლოსაა. „ვფიქრობ, შეთანხმების მიღწევასთან ახლოს ვართ. ადრე ამას არ ვამბობდი. […] მიმაჩნია, რომ ძალიან კარგი შანსია, ამ საკითხის მოგვარებაც შევძლოთ“, — უთხრა აშშ-ის პრეზიდენტმა ამერიკელ ბლოგერს ბენი ჯონსონს.
„რადიო თავისუფლება“: რუბიო ამბობდა, რომ 2027 წლის გაზაფხულამდე შეთანხმების მიღწევის არ სჯერა
ატლანტაში G20-ის საგარეო საქმეთა მინისტრების შეხვედრაზე, ევროპული ქვეყნების წარმომადგენლებთან პირად საუბრებში, რუბიო აცხადებდა, რომ არ სჯერა რუსეთის პრეზიდენტ ვლადიმირ პუტინის სურვილის, 2027 წლის გაზაფხულამდე უკრაინაში ომის შესახებ რაიმე შეთანხმება დადოს. ამის შესახებ „რადიო თავისუფალი ევროპის“ ჟურნალისტმა ალექს რაუფოღლუმ ევროპელ ოფიციალურ პირებზე დაყრდნობით განაცხადა.
„ევროპელ დიპლომატებს მოლაპარაკებების შემდეგ დარჩათ შთაბეჭდილება, რომ რუბიოს არ სჯერა, პუტინი 2027 წლის გაზაფხულამდე უკრაინის საკითხზე რაიმე შეთანხმებას დათანხმდება“, — ნათქვამია სოციალურ ქსელ X-ში რაუფოღლუს ერთ-ერთ პოსტში. „რადიო თავისუფალი ევროპის“ ვებგვერდზე გამოქვეყნებულ სტატიაში ჟურნალისტმა დაწერა, რომ აშშ-ის სახელმწიფო დეპარტამენტის ხელმძღვანელმა „დასავლელ კოლეგებთან საუბრებში […] ეჭვი გამოთქვა უახლოეს თვეებში სამშვიდობო შეთანხმების დადების შესაძლებლობის შესახებ“.
გავრცელებული ინფორმაციით, რუბიომ ევროპული ქვეყნების წარმომადგენლებს ასევე უთხრა, რომ „მთელ დონბასზე კონტროლის დამყარება კრემლის ტერიტორიულ ამბიციებს ვერ დააკმაყოფილებს“. „ეს რუსეთის მადას ვერ შეამცირებს“, — ციტირებს რაუფოღლუ აშშ-ის სახელმწიფო მდივნის სიტყვებს.
კალასი ლავროვის G20-ში მონაწილეობაზე: მოლაპარაკებებისთვის მზადყოფნის სიგნალები არ ყოფილა
რუსეთის საგარეო საქმეთა მინისტრ სერგეი ლავროვს ატლანტაში არ გამოუვლენია მოსკოვის მზადყოფნა უკრაინის საკითხზე სამშვიდობო მოლაპარაკებებისთვის, მიიჩნევს ევროკავშირის უმაღლესი წარმომადგენელი საგარეო საქმეთა და უსაფრთხოების პოლიტიკის საკითხებში კაია კალასი.
სააგენტო AFP-ის ჟურნალისტის კითხვას, მიანიშნებდა თუ არა ლავროვი ომის დასასრულებლად დათმობებზე წასვლის მზადყოფნაზე, კალასმა უარყოფითად უპასუხა. „მაშინაც კი, თუ ისინი [რუსეთის ხელისუფლების წარმომადგენლები — რედ.] სიტყვიერად საპირისპიროს ამტკიცებდნენ, მათი ქმედებები სხვა რამეზე მეტყველებს“, — თქვა პოლიტიკოსმა. მისი განცხადებით, რუსეთმა „საქმით უნდა დაამტკიცოს, რომ მოლაპარაკებებისთვის მზადაა“. მან ასევე აღნიშნა, რომ ივლისი, აგვისტო და სექტემბერი უკრაინის მშვიდობიანი მოსახლეობისთვის ყველაზე მომაკვდინებელი თვეები იყო.
რაუფოღლუს ცნობით, რუბიომ დასავლელ პოლიტიკოსებთან საუბარში განაცხადა, რომ ატლანტაში ლავროვთან სრულფასოვანი ოფიციალური შეხვედრა არ ჰქონია. როგორც იუწყებიან, მათ მხოლოდ მოკლედ განიხილეს პუტინისა და ტრამპის შესაძლო შეხვედრა აზია-წყნარი ოკეანის ეკონომიკური თანამშრომლობის ორგანიზაციის (APEC) სამიტის ფარგლებში, რომელიც 18 და 19 ნოემბერს ჩინეთის ქალაქ შენჟენში გაიმართება.