პრორუსული პარტიის, “სოლიდარობა მშვიდობისთვის, ლიდერმა მამუკა ფიფიამ და სანქცირებულმა ყოფილმა გენერალურმა პროკურორმა, ოთარ ფარცხალაძემ მოსკოვში ქართველთა და რუსთა ერთობის ფონდი დააფუძნეს.
მამუკა ფიფია ფონდის თავმჯდომარეა, ხოლო მის დამფუძნებლებს შორის ოთარ რომანოვ-ფარცხალაძე და ნიკოლაი კარტოზია არიან. ფონდის პრეზენტაცია მოსკოვში 28 ოქტომბერს გაიმართა.
ფონდის პრეზენტაციაზე მამუკა ფიფიამ განაცხადა, რომ ერთ-ერთი მიმართულება რუსეთში მცხოვრები მიხეილ სააკაშვილისა და „ნაციონალური მოძრაობის“ მხარდამჭერებთან მუშაობა იქნება. მისი თქმით, ამ ადამიანების შეხედულებებზე გავლენას ქართული ლიბერალური მედია ახდენს, ხოლო ფონდი მათი რუსეთისადმი დამოკიდებულების შეცვლას შეეცდება.
ორგანიზაცია რუსეთ-საქართველოს შორის დიპლომატიური ურთიერთობების აღდგენის მხარდაჭერასაც გეგმავს. ამ მიზნით, ფონდის წარმომადგენლებმა ვლადიმერ პუტინსა და საქართველოს ხელისუფლებას მიმართეს. ინიციატივებს შორისაა საქართველოში რუსული ენის სწავლების ხელშეწყობა, რუსეთ-საქართველოს უნივერსიტეტის შექმნა და ლომისის ეკლესიაში ღვთისმსახურების აღდგენა.
ღონისძიებას ესწრებოდნენ რუსეთში ქართული დიასპორის წარმომადგენლები, მათ შორის დავით ცეცხლაძე, ავიაკომპანია Georgian Airways-ის ყოფილი დირექტორი რომან ბოკერია, რუსეთის საგარეო საქმეთა სამინისტროსა და რუსეთის მართლმადიდებელი ეკლესიის წარმომადგენლები.
მამუკა ფიფია პრორუსული პარტიის, „სოლიდარობა მშვიდობისთვის“ ლიდერია. ოთარ ფარცხალაძე კი საქართველოს ყოფილი გენერალური პროკურორია, რომელსაც აშშ-მა 2023 წელს სანქციები დაუწესა.