ჩრდილოეთ კარილინის შტატის ქალაქ შარლოტში რესპუბლიკური პარტიის კონვენცია გაიხსნა, რომელსაც უკვე მიმართა პრეზიდენტმა დონალდ ტრამპმა.
პრეზიდენტმა პარტიის ნომინაცია მეორე ვადით უკვე მიიღო და აღტაცებულ ამომრჩევლებს, რომლებიც ამ თავყრილობაზე შეიკრიბნენ, ეკონომიკური პროგრამის და საფონდო ბირჟის წარმატების შესახებ აუწყა.
ტრამპმა თქვა, რომ დასაქმების კუთხით მისმა ადმინისტრაციამ დიდ წარმატებას მიაღწია, როცა ბოლო სამი თვის განმავლობაში დასაქმების მაჩვენებელი რეკორდულად გაიზარდა. პრეზიდენტს ამ ეტაპზე არ ჩამოუყალიბებია ქვეყნის განვითარების კონკრეტული ხედვები. ერთ-ერთი მთავარი თემა, რაზეც მან ისაუბრა მისი ოპონენტი, დემოკრატიული პარტიის კანდიდატი ჯო ბაიდენი იყო.
დონალდ ტრამპის თქმით, ყოფილი პრეზიდენტი ობამა და ვიცე პრეზიდენტი ბაიდენი 2016 წელს არჩევნების დროს მის კამპანიაზე ჯაშუშობდნენ და რომ ეს ძალისხმევა დროულად იქნა გამომჟღავნებული. პრეზიდენტმა თქვა, რომ ისინი იგივეს აპირებენ ახლაც. ამასთან ერთად, პრეზიდენტის თქმით, წელს, როდესაც მილიონობით ამერიკელი უკვე დარეგისტრირდა საპრეზიდენტო არჩევნებში ფოსტით მიიღოს მონაწილეობა და ხმა დისტანციურად მისცეს, ეს პროცესი კორუფციას შეუწყობს ხელს.
გასულ კვირას, კორონავირუსის გავრცელების შესაზღუდად, დემოკრატიული პარტიის კონვენცია ვირტუალურად გაიმართა, სადაც გამომსვლელები ზოგ შემთხვევაში პირდაპირ ეთერში, ზოგჯერ კი წინასწარ ჩაწერილი ვიდეო მიმართვებით გამოდიოდნენ ონლაინ შეკრებილი აუდიტორიის წინაშე.
წყარო: ამერიკის ხმა