{{ARTICLEIMAGE}}“თავდაცვა და უსაფრთხოება” – ახალი საგანი სკოლებში მომდევნო სასწავლო სემესტრიდან შემოდის.
ახალ საგანს სამხედროები ჩაატარებენ და მასში 2008 წლის აგვისტოს ომის შესახებ იქნება ინფორმაცია მოცემული. საგანი არჩევითი იქნება და მისი გავლის შესაძლებლობა მეათე კლასის მოსწავლეებს მიეცემათ.
საქართველოს თავდაცვის მინისტრის ლევან იზორიას განცხადებით, აგვისტოს ომთან დაკავშირებით საუბარი ფაქტების კონსტატაციის დონეზე იქნება.
ჟურნალისტის შეკითხვაზე, რა პასუხი ექნებათ ამ საგნის მასწავლებლებს თუ მოსწავლეები დასვამენ კითხვას – “ვინ დაიწყო ომი”, იზორიამ განაცხადა, რომ “საერთოდ არ არის ასეთი კითხვები ამ სახელმძღვანელოს ამოცანა”.
“ჩვენი მიდგომა ეფუძნება ტოტალური თავდაცვის პრინციპს, რაც ნიშნავს, რომ ეროვნული რესურსების მობილიზება უნდა მოხდეს. ამის ერთ-ერთი მნიშვნელოვანი შემადგენელი არის საინფორმაციო-ფსიქოლოგიური კომპონენტი, მათ შორის ტოტალური თავდაცვის. ჩვენ გავეცანით ისრაელის, სკანდინავიის ქვეყნების გამოცდილებას, სადაც საზოგადოების ჩართულობას აქვს გადამწყვეტი მნიშვნელობა. საჭიროდ ჩავთვალეთ, მათ შორის ამ ცნობიერების, პატრიოტული სულისკვეთების გაზრდის მიზნით, დავეყრდენით მათ გამოცდილებას, რათა პილოტპროექტის სახით შეგვემუშავებინა თავდაცვის და უსაფრთხოების სახელმძღვანელო. ეს სახელმძღვანელო მოზარდ თაობას გააცნობს თუ რა საფრთხეების წინაშე ვართ. ამ საფრთხეებს სჭირდება ადეკვატური აღქმა. ერთ-ერთი მნიშვნელოვანი საფრთხე საქართველოსთვის მომდინარეობს რუსეთიდან. ეს საფრთხე როგორ იქნა რეალიზებული ყველამ უნდა იცოდეს. ფაქტის კონსტატაცია დგება. მოზარდებთან როგორც არის მიზანშეწონილი იმ ფორმატში იქნება უზრუნველყოფილი ამ საგნის სწავლება”,- ამბობს იზორია.
