არაკვალიფივიურ ინიციატივად და პრეზიდენტის ინსტიტუტის დასასუსტებლად გადადგმულ კიდევ ერთი ნაბიჯად აფასებს მოქმედი პრეზიდენტის ადმინისტრაცია მმართველი გუნდის მიერ ახალ ადმინისტრაციაში დაგეგმილ ცვლილებას, რომელიც პრეზიდენტის ადმინისტრაციის დაფინანსების შემცირებასა და სარეზერვო ფონდის გაუქმებას გულისხმობს.
გიორგი აბაშიშვილის განცახდებით, მარგველაშვილის პრეზიდენტის სარეზერვო ფონდის გაუქმება გაუმართლებელია, რადგან მხოლოდ მარგველაშვილის პრეზიდენტობის პირობებში ამ ფონდიდან 400-ზე მეტი პროექტი დაფინანსდა, რომელიც დემოკრატიის გაძლიერებას და სოფლებში ყოფითი პირობების გაუმჯობესებას შეეხებოდა
საქართველოს ახალი პრეზიდენტის ადმინისტრაციის დაფინანსება თითქმის 3 მილიონ 800 ათასი ლარით მცირდება, პრეზიდენტის სარეზერვო ფონდი კი მთლიანად უქმდება.
პარლამენტში შესული 2019 წლის ბიუჯეტის პროექტის საბოლოო ვარიანტის მიხედვით, პრეზიდენტის ადმინისტრაციის დაფინანსება განსაზღვრულია 6 მილიონი ლარით, მაშინ როცა ბიუჯეტის პროექტის თავდაპირველი ვარიანტით, ის 9 800 000 ლარი იყო.
სავარაუდოდ, უქმდება პრეზიდენტის სარეზერვო ფონდიც, რომელიც ბიუჯეტის პროექტის თავდაპირველი ვარიანტით, 5 მილიონი ლარით იყო განსაზღვრული.
ასევე ცნობილი ხდება, რომ 60 %-მდე შემცირდება ახალი პრეზიდენტის ადმინისტრაციის თანამშრომელთა რაოდენობაც . ამჟამად პრეზიდენტის ადმინისტრაციაში 140 ადამიანი მუშაობს და მათი რიცხვი ახალი ადმინისტრაციის პირობებში 60-ზე მეტი ვერ იქნება.
