რუსეთის ვეტერინარული და ფიტოსანიტარიული ზედამხედველობის ფედერალური სამსახური, როსსელხოზნადზორი ავრცელებს ინფორმაციას, რომ საქართველოს სურსათის ეროვნულმა სააგენტომ რუსეთის მხარეს ქართულ ობიექტებზე სპეციალისტების ვიზიტი შესთავაზა. რუსული უწყების განმარტებით, მოწვევა უკვე გაგზავნილია და ვიზიტი მომავალ კვირას იგეგმება.
როსსელხოზნადზორის მონაცემებით, სპეციალისტები დეტალურად გაეცნობიან იმ სისტემას, რომლის მეშვეობითაც საქართველოში ხდება რუსეთში საექსპორტოდ გამიზნული თესლოვანი და კურკოვანი კულტურების ფიტოსანიტარიული სერტიფიცირება. ეს პროცედურა განსაკუთრებით მნიშვნელოვანია ექსპორტიორებისთვის, რადგან სწორედ სერტიფიკატი ადასტურებს, რომ პროდუქცია იმპორტიორი ქვეყნის ფიტოსანიტარიულ მოთხოვნებს შეესაბამება.
ვიზიტის ფარგლებში რუსი სპეციალისტები ასევე გააკონტროლებენ ლაბორატორიას, რომელიც მცენარეულ პროდუქტებში პესტიციდებისა და აგროქიმიკატების მოქმედი ნივთიერებების ნარჩენი რაოდენობის კვლევას ახორციელებს. აუდიტის შედეგებს შეიძლება გავლენა ჰქონდეს იმაზე, რამდენად მარტივად შეძლებენ ქართველი მწარმოებლები რუსულ ბაზარზე პროდუქციის რეალიზებას.
შეგახსენებთ, რომ 20-22 ოქტომბერს როსსელხოზნადზორის წარმომადგენლები თბილისში იმყოფებოდნენ, სადაც ცხოველთა ჯანმრთელობის მსოფლიო ორგანიზაციის რეგიონულ სემინარში მიიღეს მონაწილეობა. სემინარის გვერდით, რუსული უწყების წარმომადგენლებმა და საქართველოს სურსათის ეროვნული სააგენტოს ხელმძღვანელობამ ორმხრივი თანამშრომლობის საკითხები განიხილეს. როგორც ჩანს, სწორედ ამ შეხვედრების გაგრძელებაა მომავალი კვირის ვიზიტი.