ბიძინა ივანიშვილმა ყოფილ პრემიერ მინისტრს, მამუკა ბახტაძეს ქართული ოცნების საარჩევნო სიის ლიდერობა შესთავაზა. ამის შესახებ ინფორმაციას ტელეკომპანია “მთავარი” ავრცელებს. ჯერ-ჯერობით უცნობია დათანხმდება თუ არა მამუკა ბახტაძე წინასაარჩევნო ბრძოლაში პირველ ნომრად ჩართვაზე თუმცა ყოფილი პრემიერისგან უარის მოლოდინი გუნდში არავის აქვს.
“ოცნების” რიგით მეოთხე პრემიერი გასული წლის ორ სექტემბერს წავიდა. ჯერ საკმაოდ ვრცელი ფეისბუქ პოსტი დაწერა და მმართველ პარტიას ქვეყნის განვითარების მისეული ხედვა წარუდგინა, შემდეგ კი ჟურნალისტებს შეხვდა, თითქმის ორსაათიანი კითხვა-პასუხი 2020 წლის არჩევნებზე საუბრით დაასრულა. ამის შემდეგ მამუკა ბახტაძე თითქმის ცხრა თვეა საჯაროდ აღარ აქტიურობს. “ოცნებასთან” საქმიანი ურთიერთობა არ გაუწყვეტია და მმართველი პარტიის პოლიტსაჭოს წევრად დარჩა.
მმართველი პარტიის სიის ფორმირებაზე კომენტირებისას თავშეკავებულია პარტიის გენერალური მდივანი კახა კალაძე. ის პირდაპირ ამბობს, რომ როგორც ქალაქის მერს ამომრჩევლის წინაშე პასუხისმგებლობა აქვს აღებული და მერის მანდატის ბოლომდე მიყვანას აპირებს.
ბიძინა ივანიშვილის გადაწყვეტილებას, ვის დატოვებს და ვის არა 2020 წლის გადამწყევტ საარჩევნო სიაში “ქართული ოცნების დეპუტატებიც” ელოდებიან და არ მალავენ, რომ მმართველი პარტიის სიით ბრძოლას, შემდეგ კი დეპუტატობას ისევ ისურვებდნენ.