რუსეთის ჩრდილოეთ კავკასიაში, კაბარდინო-ბალყარეთის რესპუბლიკაში, მთაზე მიჟირგზე ჩამოწოლილი ზვავის შედეგად სულ მცირე 11 ალპინისტი დაიღუპა და კიდევ ექვსი დაშავდა. ინფორმაციას იუწყება Reuters ადგილობრივ საგანგებო სამსახურებზე დაყრდნობით.
ზვავი ადგილობრივი დროით საღამოს 5 საათზე ჩამოწვა, როდესაც ბეზენგის ხეობაში, 33 კაციანი ალპინისტთა ჯგუფი მარშრუტს გადიოდა.
მიჟირგი ჩრდილოეთ კავკასიის ერთ-ერთი ყველაზე მაღალი მწვერვალია — მისი სიმაღლე დაახლოებით 5 025–5 047 მეტრს შეადგენს.
საგანგებო სამსახურების ცნობით, 7 სექტემბერს, ადგილობრივი დროით დილის 9 საათისთვის, ჯგუფის 10 წევრმა მთიდან დამოუკიდებლად ჩამოსვლა შეძლო, ხოლო ექვსი ადამიანის ადგილსამყოფელი კვლავ უცნობია.
სამძებრო-სამაშველო ოპერაციაში 50-ზე მეტი სპეციალისტია ჩართული — მათ შორის ელბრუსის მაღალმთიანი საძებრო-სამაშველო რაზმის თანამშრომლები. სამუშაოებში ჩართულია აგრეთვე ვერტმფრენი Mi-8. რუსული სააგენტო TASS-ის ცნობით, რთული რელიეფისა და განმეორებითი ზვავის მაღალი საფრთხის გამო საძიებო სამუშაოები შეფერხებით მიმდინარეობს.
დაშავებული ალპინისტები ვერტმფრენით საავადმყოფოებში გადაიყვანეს. დაშავებულთა შორის არიან ხერხემლისა და კისრის ტრავმის, ასევე თავის ტვინისა და გულმკერდის დაზიანების მქონე პირები, თუმცა ეს ინფორმაცია ჯერჯერობით არაოფიციალურია.
რუსული მედიის ცნობით, ინციდენტის ფაქტზე დაწყებულია სისხლის სამართლის საქმე დაუდევრობის მუხლით.
პირველადი მონაცემები, რომლებიც 6 სექტემბრის საღამოს გახდა ცნობილი, ორ დაღუპულზე და ათ დაკარგულ ალპინისტზე მიუთითებდა; დაღუპულთა რაოდენობა თანდათან გაიზარდა და 7 სექტემბრის დილისთვის 11-ს მიაღწია.