ლიეტუვის ჩრდილოეთ და ცენტრალურ ნაწილში, ლატვიის საზღვართან ახლოს მდებარე პანევეჟისისა და შიაულიაის ოლქებში, კვირას, 18 ოქტომბერს, დილით საჰაერო განგაშის წითელი დონე გამოცხადდა. მიზეზი ქვეყნის საჰაერო სივრცეში აღმოჩენილი ამოუცნობი ობიექტი გახდა, რომელიც ჩრდილოეთის მიმართულებით გადაადგილდებოდა. მედიის ცნობით, სავარაუდოდ, საუბარია დრონზე. პანევეჟისისა და შიაულიაის ოლქების მცხოვრებლებს თავშესაფრებში გადასვლისკენ მოუწოდეს. ჰაერში ნატოს გამანადგურებლები აფრინდნენ.
კრიზისების მართვის ეროვნული ცენტრის ცნობით, საჰაერო სივრცეში ამოუცნობი ობიექტების გამო კაუნასის აეროპორტმა ადგილობრივი დროით 7:05-დან 8:00 საათამდე მუშაობა შეაჩერა.
მოგვიანებით ინტერნეტპორტალმა Delfi.lt-მ გაავრცელა ინფორმაცია, რომ 7:50 საათზე საჰაერო განგაში კაუნასისა და შიაულიაის ოლქებში გაუქმდა, 8:15 საათზე კი — პანევეჟისის ოლქშიც. მასალის გამოქვეყნების მომენტისთვის უცნობი იყო, რა დაემართა საეჭვო ობიექტს.
მოგვიანებით ლიეტუვის კრიზისების მართვის ეროვნულმა ცენტრმა განაცხადა, რომ პასვალისის რაიონის სოფელ იუოჯიონისთან აღმოაჩინეს ნაწილები, რომლებიც, სავარაუდოდ, დრონის ნამსხვრევებია. ცენტრის ცნობით, სავარაუდო უპილოტო საფრენი აპარატი შესაძლოა იქ პოლონეთის მხრიდან შეფრენილიყო.
ლატვიის მოსახლეობის გაფრთხილება საფრთხის შესახებ
იმავე დილით ლატვიის ეროვნულმა შეიარაღებულმა ძალებმა ბაუსკის, ოგრესა და აიზკრაუკლეს მხარეების მცხოვრებლები ქვეყნის საჰაერო სივრცეში შესაძლო საფრთხის შესახებ გააფრთხილა.
Delfi-ს ცნობით, მოსახლეობას ურჩიეს, დარჩენილიყო შენობებში, დაეცვა „ორი კედლის პრინციპი“ და დაეკეტა ფანჯრები და კარები. დაბალ სიმაღლეზე მფრენი, საეჭვო ან სახიფათო ობიექტის შემჩნევის შემთხვევაში მოქალაქეებს მასთან მიახლოებისგან თავის შეკავებისა და 112-ზე დარეკვისკენ მოუწოდეს.
ნახევარი საათის შემდეგ ლატვიის ეროვნულმა შეიარაღებულმა ძალებმა მოსახლეობას აცნობა, რომ საფრთხემ ჩაიარა.
„ლატვიის საჰაერო სივრცემდე არაფერს მოუღწევია. ტრაექტორიის გათვალისწინებით, განგაში წინასწარ გამოცხადდა“, — განუცხადა სააგენტო LETA-ს ოგრეს მხარის მერმა ანდრის კრაუიამ. „ეს გაკვეთილი აღმოჩნდა და ეს კარგია“, — დასძინა მან.
ბოლო თვეების განმავლობაში ნატოს წევრი ქვეყნების — ლიეტუვისა და ლატვიის — საჰაერო სივრცეში უკრაინული დრონები არაერთხელ შეფრინდნენ. უკრაინის მთავრობის ცნობით, ეს უპილოტო საფრენი აპარატები კურსს რუსეთის რადიოელექტრონული ბრძოლის საშუალებებმა ააცილა.
მსგავსი ინციდენტები „აჩენს შიშს, რომ ომი — რუსეთის ომი უკრაინის წინააღმდეგ — შესაძლოა ნატოს ტერიტორიაზეც გავრცელდეს“, — აღნიშნავენ ჟურნალისტები.