უკრაინის მიერ რუსეთის ტერიტორიაზე თავდასხმების გაფართოების ფონზე, რუს ფოსტის თანამშრომლებს დრონებთან ბრძოლის სპეციალური საშუალებები გადაეცემათ.
რუსეთის მთავრობამ ფედერალური საფოსტო სამსახურის თანამშრომლების აღჭურვილობის სია ახალი ტექნიკით შეავსო მას შემდეგ, რაც უკრაინამ არაერთი შეტევა განახორციელა საფოსტო და სასაწყობე ობიექტებზე. რუსეთში ფოსტის ზოგიერთი თანამშრომელი უკვე უფლებამოსილია ატაროს 9-მილიმეტრიანი პისტოლეტი, ელექტროშოკერი და ჯავშანჟილეტი.
მთავრობის დადგენილებაში ახალი აღჭურვილობა აღწერილია როგორც „სპეციალური ტექნიკური საშუალებები უპილოტო საფრენი, წყალქვეშა და ზედაპირული აპარატების, ავტონომიური სახმელეთო მანქანებისა და სხვა ავტომატიზებული უპილოტო სისტემების წინააღმდეგ საბრძოლველად“.
პრემიერ-მინისტრ მიხაილ მიშუსტინის მიერ ხელმოწერილ დოკუმენტში დაკონკრეტებული არ არის, კონკრეტულად რომელ საფოსტო თანამშრომლებს გადაეცემათ ეს აღჭურვილობა და რას გულისხმობს „სპეციალური ტექნიკური საშუალებები“.
2005 წლიდან მოქმედი წესებით, ფოსტის თანამშრომელთა ნაწილს უკვე შეუძლია 9-მილიმეტრიანი პისტოლეტების, ელექტროშოკერებისა და ჯავშანჟილეტების გამოყენება, თუმცა ეს ნებართვა ძირითადად უსაფრთხოების თანამშრომლებს ეხება, რომლებსაც დიდი ოდენობით ნაღდი ფული გადააქვთ.
გადაწყვეტილება მას შემდეგ მიიღეს, რაც უკრაინამ რუსეთის სიღრმეში დარტყმების კამპანია გააფართოვა და სამიზნედ მსხვილი ონლაინ-ვაჭრობის კომპანიების — Wildberries-ისა და Ozon-ის — საწყობებიც აქცია.
შეტევების შედეგად ასიათასობით გამყიდველი დაზარალდა, ხოლო ინფრასტრუქტურისა და საქონლისთვის მიყენებულმა ზარალმა, გამოცემის მონაცემებით, 7 მილიარდ ფუნტ სტერლინგს გადააჭარბა.
რუსული სახელმწიფო მედიის ცნობით, კერძო კომპანიების ხარჯები ანტიდრონულ სისტემებზე მიმდინარე წლის პირველ ნახევარში ექვსჯერ მეტად გაიზარდა და დაახლოებით 441,3 მილიონ რუბლს მიაღწია.
მაისში მოსკოვმა ასევე მოითხოვა, რომ კერძო კომპანიებმა შეიძინონ დრონების საწინააღმდეგო სისტემები, მათ შორის საზენიტო არტილერია, ტყვიამფრქვევის დანადგარები, რადარები და რადიოელექტრონული ბრძოლის საშუალებები.
აგვისტოს ბოლოს ვლადიმირ პუტინმა ხელი მოაწერა კანონს, რომელიც სახელმწიფოს უფლებას აძლევს, კონტროლი გადაიბაროს კერძო კომპანიებზე, რომლებიც უკრაინული დრონებისგან საკუთარ ობიექტებს სათანადოდ ვერ იცავენ.
პუტინის თქმით, ეს წესები შეეხება საწვავის, ენერგეტიკის, მრეწველობის, კავშირგაბმულობის, ტრანსპორტისა და ლოგისტიკის სექტორებს და, მისი მტკიცებით, კერძო საკუთრების „ნაციონალიზაციის გეგმებს“ არ უკავშირდება.
ოთხშაბათს უკრაინულმა დრონებმა რუსეთის ეკონომიკურ ობიექტებზე შეტევები გააგრძელეს და ნოვოროსიისკში ნავთობტერმინალს დაარტყეს. შედეგად ოთხი ადამიანი დაიღუპა და 29 დაშავდა.
რუსეთის თავდაცვის სამინისტრო ამტკიცებს, რომ ღამით რუსეთისა და ოკუპირებული ყირიმის მიმართულებით თითქმის 600 უკრაინული დრონი ჩამოაგდო.