რუსმა ფილოსოფოსმა ალექსანდრ დუგინმა განაცხადა, რომ კიევს რუსეთის ჯარები „უახლოეს თვეებში აიღებენ“.
„კიევს უახლოეს თვეებში აიღებენ“, — დაწერა დუგინმა თავის Telegram-არხზე.
მას ამ პროგნოზის სხვა დეტალები ან დასაბუთება არ მოუყვანია.
ალექსანდრ დუგინი რუსი ულტრანაციონალისტი ფილოსოფოსი და ე.წ. ევრაზიანიზმის ერთ-ერთი მთავარი იდეოლოგია. მას ხშირად „პუტინის იდეოლოგსაც“ უწოდებენ, თუმცა მისი უშუალო გავლენა კრემლის გადაწყვეტილებებზე სადავოა და დუგინს რუსეთის ხელისუფლებაში ოფიციალური თანამდებობა არ უკავია. ევროკავშირმა ის 2022 წელს სანქციების სიაში შეიყვანა, როგორც კრემლის დეზინფორმაციისა და საინფორმაციო მანიპულაციის ეკოსისტემის წარმომადგენელი; აშშ-ის სანქციების ქვეშ კი ჯერ კიდევ 2015 წლიდანაა უკრაინის ტერიტორიული მთლიანობის წინააღმდეგ მიმართულ საქმიანობასთან დაკავშირებით.
2022 წლის აპრილში, სრულმასშტაბიანი შეჭრის დაწყებიდან ორი თვის შემდეგ, დუგინი უკვე უკრაინაზე გაცილებით ფართო სცენარს აღწერდა: დონეცკისა და ლუგანსკის გარდა რუსეთის კონტროლის ქვეშ მოიაზრებდა ხერსონს, ზაპოროჟიეს, ხარკოვს, მიკოლაევს, დნიპროს, შესაძლო ოდესას და საბოლოოდ — კიევსა და მთლიან უკრაინას. ეს მაქსიმალისტური სცენარი არ განხორციელებულა. რუსეთმა სამხრეთ და აღმოსავლეთ უკრაინაში მნიშვნელოვანი ტერიტორიები დაიკავა, თუმცა კიევის აღება ვერ შეძლო და 2022 წლის გაზაფხულზე კიევის ოლქიდან უკან დაიხია.
თავად დუგინმაც 2026 წელს აღიარა, რომ რუსეთის საწყისი გათვლა სწრაფ გამარჯვებასა და კიევის აღებაზე მცდარი აღმოჩნდა: მისი სიტყვებით, რუსეთმა 2022 წელს კიევის აღება ვერ შეძლო და თავდაპირველი გეგმა „ამოიწურა“.