პარიზის გარეუბანში შეიარაღებული თავდასხმების სერიის შედეგად ერთი ადამიანი დაიღუპა და კიდევ ხუთი დაშავდა. დაჭრილებს შორის 12 წლის გოგონაცაა. ხელისუფლება მომხდარს იძიებს, როგორც ტერორისტულ აქტს, რომლის შესაძლო მოტივი ისლამოფობია ან რასიზმია.
პირველი თავდასხმა პარიზის სამხრეთ-დასავლეთით მდებარე ქალაქ ტრაპში მოხდა, სადაც თავდამსხმელმა მოძრავი ავტომობილიდან გახსნა ცეცხლი. ამის შემდეგ ის ახლომდებარე ლა-ვერიერში გადავიდა.
შინაგან საქმეთა მინისტრ ლორან ნიუნესის თქმით, თავდასხმები, საერთო ჯამში, თითქმის 15 წუთს გაგრძელდა.
სავარაუდო თავდამსხმელი ქალაქ კუანიერში დააკავეს. ადგილობრივი მედიის ინფორმაციით, ის 39 წლისაა და ადრე პოლიციის ყურადღების ცენტრში მოხვედრილა, თუმცა საფრანგეთის სპეცსამსახურებისთვის ცნობილი არ ყოფილა. საფრანგეთის ანტიტერორისტულმა პროკურატურამ BFMTV-ს განუცხადა, რომ ეჭვმიტანილი არ ირიცხებოდა იმ პირთა რეესტრში, რომლებიც უსაფრთხოებისთვის სერიოზულ საფრთხეს წარმოადგენენ.
ხელისუფლება მის მოტივებზე ჯერჯერობით დარწმუნებით არ საუბრობს, თუმცა საფრანგეთის ეროვნულმა ანტიტერორისტულმა პროკურატურამ (PNAT) განაცხადა, რომ მომხდარი, როგორც ჩანს, „ტერორისტულ საქმიანობასთან დაკავშირებული მკვლელობაა“. „ეს უდავოდ ტერორისტული ხასიათის დანაშაულია. სწორედ ამის შესახებ განაცხადა [პროკურორმა]“, — უთხრა ნიუნესმა ჟურნალისტებს ტრაპში.
სროლის შესაძლო მოტივებზე დასმულ კითხვაზე პასუხად ტრაპის მერმა ალი რაბემ განაცხადა, რომ დაღუპული აფრიკული წარმოშობის იყო, ხოლო ერთ-ერთი დაზარალებული, რომელიც კრიტიკულ მდგომარეობაში იმყოფება, ჩრდილოეთ აფრიკიდანაა. მისი თქმით, თავდასხმას „რასისტული, სავარაუდოდ, ისლამოფობიური სარჩული“ ჰქონდა.
რაბეს განცხადებით, პარასკევს დილით „უცნობმა პირმა საკუთარი ავტომობილიდან ცეცხლი გაუხსნა რამდენიმე ადამიანს, რომლებიც გზად შეხვდნენ“.
თვითმხილველთა თქმით, შეიარაღებულმა მამაკაცმა ნაცრისფერი Renault Clio-თი ქალაქის რამდენიმე უბანი გაიარა. როგორც რაბემ განაცხადა, ის „განურჩევლად ისროდა“ და, როგორც ჩანს, ცდილობდა, „რაც შეიძლება მეტი ადამიანისთვის“ მიეყენებინა ზიანი. „მას სისხლიანი ხოცვა-ჟლეტის მოწყობა სურდა“, — თქვა მერმა.
მისი თქმით, თავდამსხმელმა ტრაპში ადამიანებს ცეცხლი გაუხსნა ავტოგასამართ სადგურზე, სამედიცინო ცენტრთან და საბავშვო მოედანზე, შემდეგ კი მეზობელ ლა-ვერიერს მიაშურა.
სავარაუდო მოტივი
დაჭრილი 12 წლის გოგონას დედამ ფრანგულ რადიოსადგურ RTL-ს უთხრა, რომ მისმა შვილმა რვა ცეცხლნასროლი ჭრილობა მიიღო და ქირურგიული ოპერაცია სჭირდება. ქალის თქმით, მის შვილს თავზე თავსაფარი ეკეთა და, შესაძლოა, თავდასხმის მიზეზიც ეს გამხდარიყო. „ის ბავშვია, რომელიც საფრანგეთში, ტრაპში დაიბადა. მას უფლება აქვს, საფრანგეთში იცხოვროს და საკუთარი ცხოვრება აქ ააწყოს“, — დასძინა ქალმა.
ანტიტერორისტულმა პროკურატურამ თავის განცხადებაში საზოგადოებას მოუწოდა, თავდამსხმელის მოტივებთან დაკავშირებით ნაჩქარევ დასკვნებს ნუ გამოიტანენ.
ამასთან, სავარაუდო დანაშაულთა ჩამონათვალში, რომლებზეც გამოძიება მიმდინარეობს, პროკურატურამ მიუთითა „ტერორისტულ საქმიანობასთან დაკავშირებული მკვლელობა“, დამამძიმებელი გარემოებით — დანაშაულის ჩადენა დაზარალებულთა ამა თუ იმ რასისადმი, ეთნიკური ჯგუფისადმი, ეროვნებისა თუ რელიგიისადმი რეალური ან სავარაუდო კუთვნილების გამო.
მედიის ცნობით, თავდამსხმელი ერთ-ერთ მთავარ გზაზე გადაადგილდებოდა და პერიოდულად ავტომობილის ფანჯრიდან ისროდა.
ადგილობრივი პოლიციის უფროსმა ტელეარხ BFMTV-ს განუცხადა, რომ ეჭვმიტანილი „ძველი მოდელის ნახევრად ავტომატურ იარაღს“ იყენებდა და ჯერებით ისროდა. როგორც Le Parisien წერს, იარაღი ჯერ კიდევ მეორე მსოფლიო ომის დროს იყო დამზადებული.
ტრაპის მერის თქმით, თავდასხმისას მსროლელმა დააზიანა სამედიცინო ცენტრის შენობა, ავტოგასამართი სადგური და რამდენიმე ავტომობილი.
საფრანგეთის ეროვნულმა ანტიტერორისტულმა პროკურატურამ (PNAT) განაცხადა, რომ გამოძიება ასევე მიმდინარეობს „A კატეგორიის იარაღის უკანონო შენახვის“ მუხლით. ამ კატეგორიას მიეკუთვნება, მათ შორის, სამხედრო დანიშნულების იარაღი და იარაღი, რომელსაც ჯერებით სროლა შეუძლია.
გარდა ამისა, ანტიტერორისტული პროკურატურა იძიებს შესაძლო „დანაშაულებრივ შეთქმულებას ტერორისტულ ჯგუფთან, პიროვნების წინააღმდეგ მიმართული დანაშაულების მომზადების მიზნით“.