სამთავრობო ტელეკომპანია იმედის წამყვანი, გია აბაშიძე Facebook-ზე წერს, რომ დანიაში საქართველოს ელჩმა თანამდებობა უნდა დატოვოს.
“არცერთი ქვეყნის ელჩი მისი სამშობლოს და არც სხვა დემოკრატიული სახელმწიფოების სამართალდამცავი, საგამოძიებო სტრუქტურების მუშაობას საჯაროდ ეჭვქვეშ არ აყენებს! თუ აყენებს, მაშინ ემშვიდობება თანამდებობას! 2X2=4!” – წერს გია აბაშიძე.
გუშინ დანიაში საქართველოს ელჩმა, გიგი გიგიაძემ საქართველო-აზერბაიჯანის დემარკაციის კომისიის ექსპერტთა საბჭოს ყოფილ უფროსს, ივერი მელაშვილს სოლიდარობა გამოუცხადა. ელჩმა მისთვის წარდგენილ ბრალს აბსურდული უწოდა.
“სრულ მხარდაჭერას ვუცხადებ ივერი მელაშვილს, რომელსაც პირადად ვიცნობ 1997 წლიდან და მიმაჩნია, რომ ის არის საკუთარი ქვეყნის, საქართველოს გამორჩეული პატრიოტი, ჩვენი სახელმწიფო საზღვრის დელიმიტაცია-დემარკაციის პროცესის პროფესიონალი და შეუცვლელი ექსპერტი. წარდგენილი ბრალდება იმდენად აბსურდული და საღ აზრს მოკლებულია, რომ ამაზე კომენტარის გაკეთებაც მიჭირს. იმედს ვიტოვებ, რომ ეს დაწყებული გამოძიება ყველა არსებულ კითხვას ამომწურავ პასუხს გასცემს და სრულიად უდანაშაულო, თავის ქვეყანაზე შეყვარებული ადამიანი მალევე გათავისუფლდება”, – დაწერა გიგიაძემ ფეისბუქ გვერდზე.
გუშინ საქართველო-აზერბაიჯანის დემარკაციის კომისიის ექსპერტთა საბჭოს უფროსი, ივერი მელაშვილი და საბჭოს წევრი, ნატალია ილიჩოვა დააკავეს. პროკურატურის ინფორმაციით, მათ ბრალად უცხო ქვეყნისათვის საქართველოს ტერიტორიის ნაწილის გადაცემისაკენ მიმართული მოქმედება ედებათ. ბრალის დამტკიცების შემთხვევაში ილიჩოვასა და მელაშვილს 10-დან 15 წლამდე პატიმრობა ემუქრებათ.
პროკურატურა ამტკიცებს, რომ დაკავებულებმა საზღვარი საქართველოს საზიანოდ მონიშნეს და “საქართველოს ტერიტორიის ნაწილი უცხო ქვეყანას გადასცეს”.
მათ დღეს ბრალი ოფიციალურად წარედგინათ.
