პრემიერმა ბესელიას გადაწყვეტილებაზე კომენტარი გააკეთა

{{ARTICLEIMAGE}}
“ეს არის ქალბატონი ეკას პირადი პოზიცია და დარწმუნებული ვარ, მას აქვს ამის უფლება და მან განმარტებაც გააკეთა“, – ასეთი კომენტარი გააკეთა საქართველოს პრემიერ-მინისტრმა მამუკა ბახტაძემ ეკა ბესელიას გადაწყვეტილებაზე, რომელიც პარლამენტის იურიდიული კომიტეტის თავმჯდომარის პოსტის დატოვებას გულისხმობს.

მამუკა ბახტაძის განცხადებით, აღმასრულებელი ხელისუფლება არ უნდა ერეოდეს ხელისუფლების სხვა შტოებში მიმდინარე პროცესში: “რა თქმა უნდა, ჩემი პოზიცია აუცილებლად იქნება ის, რომ აღმასრულებელი ხელისუფლება არ უნდა ჩაერიოს სხვა ხელისუფლების შტოს პროცესებში. როდესაც ჩვენ ვსაუბრობთ სასამართლოზე, თქვენ მოგეწონებოდათ, რომ როგორც ხდებოდა, ქვეყნის პირველი პირები ურეკავდნენ მოსამართლეებს და თავის მოსაზრებებს ეუბნებოდნენ? ვფიქრობ, ეს არის სრულიად მიუღებელი. ჩვენ ვაშენებთ სამართლებრივ ქვეყანას. ჩვენ გვაქვს ახალი და გამართული კონსტიტუცია და ყველამ ამ კონსტიტუციის ფარგლებში უნდა ვიმუშაოთ. ღმერთმა არ ქნას, რომ ყველა საკითხზე იყოს აზრთა ერთობლიობა. ჩვენ გვაქვს ეროვნული ინტერესები და პოლიტიკური გუნდი არის თანხვედრაში ამ ინტერესებთან დაკავშირებით. ეს არის ცოცხალი პოლიტიკური პროცესი და ყველა ადამიანს შეიძლება, ჰქონდეს თავისი შეხედულება. ის თავისუფალია თავის არჩევანში“.