დაპირისპირება “კოალიცია ცვლილებისთვის“ ერთ–ერთ ლიდერს, ნიკა გვარამიასა და ნაციონალურ მოძრაობას შორის გრძელდება. ამჯერად ერთმანეთს ნიკა გვარამია და ანი წითლიძე დაუპირისპირდნენ. ნიკა გვარამიამ ფეისბუქ სტატუსით მის მიმართ მიხეილ სააკაშვილის და პარტიის სხვა წევრების ბრალდებებს უპასუხა, კონკრეტულად კი მისი კოალიციის ნიკა გილაურის მხრიდან დაფინანსების შესახებ, და დაწერა:
რაკიღა ნაცმოძრაობამ მოიგონა ბინძური ტყუილები და ისეთი შეურაცხყოფაც კი მაკადრა, როგორც აფხაზეთის დავიწყების სურვილი, თან არა მარტო მე, არამედ ჩემს მეგობრებსაც, ახლა მე დავსვამ შეკითხვებს იმაზე, რაც მართლა მოხდა.
ქვემოთ ნიკა გილაურის ინტერვიუს ვდებ, რომელიც დღეს რადიო თავისუფლებამ გაავრცელა. ამ ფონზე იდეა მომივიდა, მოვისმინოთ დავით კირკიტაძის (ენმ სიის 26ე ნომერი) ან რამაზ ნიკოლეიშვილის (ენმ სიის მე12 ნომერი) ინტერვიუები.
პირველმა ენმსგან 9 მილიონად იყიდა ოფისი (პროქსის მეშვეობით) და დღეს ამ ოფისიდან ჩინურ მანქანებს ყიდის და ფულს აკეთებს. დღემდე გაურკვეველია, ენმს წევრმა კირკიტაძემ ხელისუფლებაში ყოფნისას იშოვნა ამხელა თანხა (თავი რომ დავანებოთ სახლებსა და მანქანებს), თუ ბიძინას დროს, რაც მხოლოდ ბიძინასთან თანამშრომლობითაა შესაძლებელი. ასევე გაურკვეველია, თუ 9 მილიონი დაჯდა პარტიის ანგარიშზე, რატომ “ტირის” ენმ, რომ არაფრის ფული არ აქვს.
მეორემ, რამაზ ნიკოლეიშვილმა, ასევე მისმა მძღოლმა აბდულა ისმაილოვმა “მოახერხეს” და 2020 წლის მოწვევის პარლამენტში ჯერ წევრებად შევიდნენ და შემდეგ იმ დეპუტატთა ჯგუფში მოხვდნენ, ვისაც ხმა არ ამოუღია არც ერთხელ. რამაზ ნიკოლეიშვილი შემდეგ საპარლამენტო სიაში მაინც მოხვდა 2024 წელს, თან მე12 ნომრად. მისი აზრი საქართველოში მიმდინარე მოვლენებზე, ისევე, როგორც კირკიტაძის, არავის არ გაგვიგია. ეს ხალხი საერთოდ არავის უნახავს არჩევნების შემდეგ. იმაზე აღარ ვლაპარაკობ, რომ გილაურისგან განსხვავებით, საკუთარი პარტიის პატიმრების ფულიც კი არ გადაუხდიათ, სხვების კი არა. და სხვების გაქრობაზე (სად გაქრა გილაური?) და პოლიტიკურ კორუფციაზე ლაპარაკობს ეს პარტია, თან სრულ ტყუილებს.
ახლების სიაში ერთ ადამიანს მაინც თუ იპოვნით ვინმე ან გილაურის ჩასმულს, ან ფული ვინც გადაიხადა, საჯაროდ პასუხი მომთხოვეთ და მამხილეთ.
გილაურის გაუჩინარებაზე რომ ლაპარაკობს, იმ პარტიას ვეკითხები: ეს ხალხი სადაა? ან როგორ ხდება, რომ არავინ არ შეხებიათ და დღემდე ფულს აკეთებენ? შემთხვევით ხდება ესეც ბიძინას საქართველოში? შეკითხვა რიტორიკულია.
რაც მეტ ტყუილს მოიგონებთ, მით მეტ სიმართლეს მიიღებთ. გარანტიას გაძლევთ“–დაწერა გვარამიამ და რადიო თავისუფლების გამოძიება გააზიარა, რომელიც გილაურის კომპანების დაჯარიმებას და მისი სახლის აუქციონზე გაყიდვას ეხება.
დაპირისპირების ეს ბოლო რაუნდი ნაციონალური მოძრაობის წევრის, ანი წითლიძის ფეისბუქ სტატუსს მოჰყვა, რომელმაც, თავის მხრივ, ნიკა გვარამიას სტატუსი გააზიარა და დაწერა:
ამას კადრულობს ადამიანი, რომელმაც ჯერ „რუსთავი 2“, მერე „მთავარი არხი“ და შემდეგ „ნაციონალური მოძრაობა“ გაძარცვა;
ადამიანი, რომელსაც თვეში 85 ათასი ლარი — და ეს ყველაზე ნაკლები თანხა იყო — ხელფასად ჰქონდა მაშინ, როცა მისი თანამშრომლების დიდი ნაწილი თვეების განმავლობაში ხელფასს ვერ იღებდნენ.
შემდეგ ესეც არ ეყო: ჯერ ბიძინას დავალებით „მთავარი არხი“ დახურა, მერე კი ისევ იმ ადამიანებს მიადგა, ვინც მას ჩააცვა და ღალატის სანაცვლოდ 40 მილიონი აიღო.ახლა კი, როცა გაიშიფრა და „თანამედროვე მერაბ კოსტავას“ ნაცვლად — როგორც საკუთარ თავს უწოდებდა — დისკრედიტირებული საკუთარი თავი შერჩა, კარდაკარ დარბის და ამ ფორმით შეურაცხყოფას აყენებს იმ ადამიანებს, რომლებიც 14 წელია უანგაროდ იბრძვიან რეჟიმის წინააღმდეგ.მაშინაც უანგაროდ იბრძოდნენ, როცა გვარამია თვეში 85 ათას ლარს იღებდა ხელფასად. ( ეს ხელფასი თორემ სხვა თანხებს კიდევ ვინ მოთვლის)ჩემო ნიკა, ტყუილად გგონია, რომ აქ ვინმე რამეს მოგითმენს. შენ ვინ უნდა იყიდო, უკვე ნაყიდი და გადმოფურთხებული ჰყავხარ ბიძინას.“– დაწერა ანი წითლიძემ.