რუმინეთის F-16-მა შავ ზღვაში, Neptun Deep-ის მახლობლად, ასაფეთქებელი მასალით დატვირთული საზღვაო დრონი გაანადგურა
რუმინეთის თავდაცვის მინისტრმა რადუ მირუცამ განაცხადა, რომ რუმინეთის შეიარაღებულმა ძალებმა შავ ზღვაში, გაზის საბადო Neptun Deep-ის მახლობლად, გაანადგურეს საზღვაო დრონი, რომელიც ასაფეთქებელი მასალით იყო დატვირთული. დრონი გაზმომპოვები სადგურიდან რამდენიმე ასეული მეტრით დაშორებით აღმოაჩინეს. მინისტრის განცხადებით, საჰაერო სივრცეში ორი F-16-ის ტიპის გამანადგურებელი ავიდა და ცეცხლის გახსნის ბრძანება მიიღეს, რის შემდეგაც დრონი ერთ-ერთი თვითმფრინავის ბორტული ქვემეხის საშუალებით განადგურდა.
მირუცას თანახმად, ინციდენტის შესახებ ხელისუფლებას დილას საზღვრის დაცვის სამსახურმა აცნობა. თავდაცვის სამინისტრომ საკითხზე კიევის მხარესთანაც დაუკავშირდა — უკრაინის მხარემ დაადასტურა, რომ დრონი მას არ ეკუთვნოდა.
რუმინეთის პრეზიდენტმა ნიკუშორ დანმა X-ზე გამოქვეყნებულ განცხადებაში მკაცრად დაგმო რუსეთის ფედერაციის მხრიდან მსგავსი ინციდენტების გახშირება და აღნიშნა, რომ ქვეყანა ნატოს მოკავშირეებთან ერთად სიფხიზლეს ინარჩუნებს.
ცალკე ეპიზოდში, იმავე დღის ღამის საათებში, რუმინეთის საჰაერო სივრცეში დრონი შეიჭრა და უკრაინის საზღვრის სიახლოვეს, თულჩის ჟუდეცში, სოფელ გრინდუსთან ჩამოვარდა. თავდაცვის სამინისტროს ცნობით, ღამის 02:23 საათზე რადიოლოკაციური სისტემით საზღვართან საჰაერო სამიზნეთა ჯგუფი დაფიქსირდა, რის შემდეგაც ესპანეთის საჰაერო ძალების ორი F-18-ის ტიპის თვითმფრინავი — რომლებიც ნატოს საჰაერო პატრულირების მისიის ფარგლებში რუმინეთშია განლაგებული — და რუმინეთის საჰაერო ძალების ვერტმფრენი IAR-330 SOCAT აფრინდნენ დაზვერვის მისიით.
დრონი სოფელ გრინდუდან დაახლოებით 4 კილომეტრში, დაუსახლებელ ზონაში ჩამოვარდა. ჩამოვარდნის შედეგად წარმოქმნილი ხანძარი დამოუკიდებლად ჩაქრა; დაზარალებული და მატერიალური ზარალი არ დაფიქსირებულა.
თავდაცვის სამინისტროს განახლებული ინფორმაციით, ადგილზე ჩატარებული შემოწმებით დადგინდა, რომ დრონის ნამსხვრევები პიროტექნიკურ საფრთხეს არ წარმოადგენს. ნამსხვრევები საზღვრის პოლიციამ ამოიღო შემდგომი გამოძიებისთვის, ხოლო საქმეს კონსტანცას სააპელაციო სასამართლოსთან არსებული პროკურატურა აწარმოებს.