უპრეცედენტო რაოდენობის რუსეთის მოქალაქეთა მიერ ლარსის საზღვრის კვეთის შესახებ რუსეთის საბაჟო სამსახურის მონაცემებს რუსული მედია მოსალოდნელ მობილიზაციას უკავშირებს.
მობილიზაცია სახელმწიფო სათათბიროს სექტემბრის არჩევნების შემდეგ შეიძლება გამოცხადდეს. ვაშინგტონის ომის შემსწავლელი ინსტიტუტი წერს, რომ ხელისუფლება ამისთვის ემზადება. უკრაინის პრეზიდენტი ვოლოდიმირ ზელენსკიც აცხადებს, რომ პუტინი ფრონტზე 300-დან 500 ათასამდე ადამიანის გაგზავნას გეგმავს.
გრიგორი სვერდლინი – რუსი ოპოზიციონერი აქტივისტი, ანტისაომატი ორგანიზაციის, – „წადით ტყით“ დამფუძნებელი., რომელიც რუს მამაკაცებს მობილიზაციისთვის თავის არიდებაში და ქვეყნიდან გაქცევაში ეხმარება, ამბობს, რომ ბოლო პერიოდში მობილიზაციის შიშით რუსეთიდან წასვლის მსურველთა რაოდენობა მართლაც კოლოსალურად გაიზარდა. ის კომენტარს აკეთებს საქართველოს შსს-ს მიერ გუშინ გვარცლებულ განცხადებაზეც, რომლითაც მან რუსეთის საბაჟოს მიერ გავრცელებული საზღვრის კვეთის გაზრდილი მონაცემები უარყო.
„ლარსზე რიგები მართლაც არის. როგორც ჩანს, ხმები ახალი მობილიზაციის შესახებ სიმართლეა, რაც მოქმედებს რუსეთის შიგნით განწყობებზე. ბევრი შიშია, პანიკაა. ჩვენი ორგანიზაციის ცხელ ხაზზე ფიქსირდება უამრავი ზარი, მათ შორის იმ ადამიანების, რომლებიც ჯერ არ წასულან რუსეთის არმიაში და არც სურთ წასვლა. ამიტომ, რუსეთიდან წამსვლელთა რაოდენობა იზრდება. ინტერესდებიან, როგორ გადაკვეთონ საზღვარი. გვიკავშირდებიან კომპანიებიც, რომლებსაც სურთ თავისი თანამშრომლები დისტანციურ სამუშაოზე გადაიყვანონ, მაგალითად თბილისში, ერევანში“ – ამბობს სვერდლინი.
ჟურნალისტის კითხვაზე კი – რატომ უარყოფს საქართველოს ხელისუფლება ინფორმაციას, რომ რუსეთიდან მგზავრთა ნაკადი გაზრდილია – პასუხობს:
„საქართველოში პრორუსული ხელისუფლებაა და მე ვფიქრობ, რომ ამ განცხადების სტილი ძალიან ჰგავს იმ სტილს, რომელსაც რუსეთის ხელისუფლება იყენებს. აშკარა ტყუილია. ჩემი აზრით, საქართველოს ხელისუფლება რუსეთისკენ იყურება და აკეთებს იმას, რაც სურს რუსეთს. რუსეთს კი სურს, მობილიზაციაზე საუბრები ჯერჯერობით დამალოს“.
დღეს რუსეთის საბაჟო სამსახურმა კიდევ ერთი განცხადება გაავრცელა, რომელშიც ნათქვამია, რომ ზემო ლარსის სასაზღვრო გამშვებ პუნქტზე მოგზაურთა რეკორდული ნაკადი ტურისტულ სეზონს უკავშირდება.
ამ დღეებში კი რუსული მედია რუსეთის ფედერალური საბაჟო სამსახურის 18 აგვისტოს საღამოს გავრცელებულ ინფორმაციაზე დაყრდნობით წერდა, რომ რუსეთ–საქართველოს საზღვარი ბოლო 24 საათში 20 ათასზე მეტმა ადამიანმა გადაკვეთა. რუსეთის საბაჟო უწყების ინფორმაციით, მსგავსი დინამიკა უკვე რამდენიმე დღეა შეინიშნება. 15 და 16 აგვისტოს ზემო ლარსის გამშვებ პუნქტზე ყოველდღიურად 19 აათასზე მეტი ადამიანი გადადიოდა. რუსული მედია ლარსზე არსებული რიგების ფოტოებს და ვიდეოებსაც ავრცელებს.
ამის შემდეგ 19 აგვისტოს, ინფორმაცია გაავრცელა საქართველოს შინაგან საქმეთა სამინისტრომ, რომელმაც თქვა, რომ მედიასაშუალებებსა და სოციალურ ქსელებში გავრცელებული ინფორმაცია სიმართლეს არ შეესაბამება და ბოლო 24 საათის მონაცემებით, საქართველოს სახელმწიფო საზღვარი, ლარსის გავლით, სხვადასხვა ქვეყნის 7880 -მა მოქალაქემ გადმოკვეთა.