ენმ-ის წევრის, ბესო შენგელიას განცხადებით, ქართული მხარის მიერ კონტროლირებადი ტერიტორიიდან ოკუპირებულ აფხაზეთში გაგზავნილი საწვავის 85% საოკუპაციო ძალებთან მიდის. შენგელიას მტკიცებით, ამ საწვავით უკრაინის წინააღმდეგ ომში ჩართული სამხედრო-სტრატეგიული ობიექტები მარაგდება.
“ე.წ. ჰუმანიტარულ დახმარებაზე ირაკლი კობახიძის განცხადება არის თვალის ახვევა, სიცრუე და ეროვნული ინტერესების ღალატი. საქართველოდან გაზიდული საწვავი პირდაპირ ხმარდება რუსულ საოკუპაციო მანქანასა და სეპარატისტებს. ხელისუფლებად წოდებულ რეჟიმს შევახსენებთ, რომ საომარი მდგომარეობის დროს აგრესორის საწვავითა და საპოხი მასალით პირდაპირი თუ ირიბი მომარაგება წარმოადგენს საომარი მოქმედებების მხარდაჭერას, მტრისთვის იარაღის მიწოდების ტოლფას ქმედებას.
ჩვენი ინფორმაციით, საქართველოდან გასული საწვავის 85% პირდაპირ საოკუპაციო ძალებთან მიდის და მარაგდება უკრაინაში მიმდინარე ომში ჩართული სამხედრო-სტრატეგიული ობიექტები. ესენია:
- რუსეთის მე-7 სამხედრო ბაზა გუდაუთაში. სამხედრო ნაწილი №09322 – რომელიც უკრაინის წინააღმდეგ ომში პირველივე დღიდან მონაწილეობს და იქ რამდენიმე მოტომსროლელი ბრიგადა ჰყავს გაგზავნილი.
- რუსეთის ФСБ-ს სასაზღვრო დივიზია და საზღვაო ფლოტი, რომელიც განლაგებულია ოჩამჩირეში. ქართულ საწვავს პირდაპირ ასხამენ ФСБ-ს სამხედრო კატარღებში, რომლებიც შავი ზღვის აკვატორიაში მოქმედებენ.
- გუდაუთის ბომბორას სამხედრო აეროდრომი ქართული საწვავით ფუნქციონირებს.
- წებელდისა და ნაგვალოუს პოლიგონები, სადაც ამ საწვავით ოკუპანტების ძირითადი საბრძოლო წვრთნები ტარდება.
დარჩენილი 15%-დან 10%-ს ინაწილებენ დეფაქტო ძალოვანი სტრუქტურები […] ბოლო 5%-ის ხელში ჩასაგდებად კი ერთმანეთს გალის მილიციის უფროსი და “გაის” ხელმძღვანელი ებრძვიან […] არცერთი ლიტრი საწვავი რიგით მოქალაქემდე უფასოდ ან პირდაპირი წესით არ მიდის”. – ნათქვამია ნაციონალური მოძრაობის განცხადებაში.