პოლონეთის საგარეო საქმეთა მინისტრის, რადოსლავ სიკორსკის მიერ ხელმოწერილი ახალი სამართლებრივი აქტი მიზნად ისახავს უვიზო მიმოსვლის რეჟიმის არალეგალური შრომისთვის გამოყენების აღკვეთას და ქვეყანაში მიგრაციული ნაკადების მკაცრ კონტროლს.
ახალი რეგულაციის თანახმად, აღნიშნული სამი ქვეყნის მოქალაქეები, რომლებსაც პოლონეთში დასაქმება სურთ, ვალდებულნი არიან ეროვნული სამუშაო ვიზა გამგზავრებამდე, საკუთარ ქვეყანაშივე გააფორმონ.
კანონმდებლობა კრძალავს ტურისტული ან სხვა მოკლევადიანი უვიზო რეჟიმით პოლონეთში ჩასვლას და იქ ადგილზე მუშაობის დაწყებას, მიუხედავად იმისა, აქვს თუ არა პირს ოფიციალური სამუშაო ნებართვა.
ცვლილებები არ ეხება სტანდარტულ ტურისტულ, კულტურულ ან საოჯახო ვიზიტებს — უვიზო მიმოსვლა ამ მიზნებისთვის კვლავ ძალაში რჩება.
პოლონეთის მთავრობის განმარტებით, აღნიშნული გადაწყვეტილების მიზეზი გახდა ტენდენცია, რომლის დროსაც საქართველოს, კოლუმბიისა და ვენესუელის მოქალაქეები სისტემატურად იყენებდნენ ბიომეტრიულ პასპორტებს შრომით ბაზარზე არალეგალურად შესაღწევად. ოფიციალური უწყებების განცხადებით, ეს ნაბიჯი დაიცავს უცხოელ მუშახელს ექსპლუატაციისა და არაკეთილსინდისიერი დამსაქმებლებისგან, ასევე ხელს შეუწყობს ჩრდილოვანი ეკონომიკის შემცირებას.
რაც შეეხება იმ პირებს, რომლებიც პოლონეთის ტერიტორიაზე ახალი კანონის ამოქმედებამდე შევიდნენ და მუშაობა უკვე დაწყებული ჰქონდათ, მათზე ძველი წესები გავრცელდება. მათ ეძლევათ უფლება, გააგრძელონ საქმიანობა ქვეყანაში ლეგალურად ყოფნის მიმდინარე ვადის ამოწურვამდე.
ცვლილებები ორ ეტაპად შედის ძალაში: 15 აგვისტოდან პოლონეთში სამუშაო მიზნით შესვლა უვიზოდ აღარ შეიძლება (საჭიროა ეროვნული ვიზა). 22 აგვისტოდან კი უვიზო რეჟიმში ყოფნისას სამუშაო ნებართვითაც კი აღარ შეიძლება მუშაობა.