ვიტყოდი, რომ თავად რუსეთშიც ზოგიერთი ადამიანის თვალში, უკრაინაში შეჭრა რუსეთისთვის სტრატეგიული კატასტროფა აღმოჩნდა. ისინი ნამდვილად ვერ მიაღწევენ იმ მიზნებს, რომლებიც ომის პირველ დღეს დაისახეს, და შესაძლოა ვერც იმ მიზნების სამხედრო გზით მიღწევა შეძლონ, რომლებსაც ახლა მოლაპარაკებების პროცესში ითხოვენ.
ასევე ვიტყოდი, რომ ჩვენი ხედვით, ამ ომს სამხედრო გადაწყვეტა ვერ ექნება. ის აუცილებლად მოლაპარაკებების გზით მიღწეული შეთანხმებით უნდა დასრულდეს. სამწუხაროდ, ბოლო თვეებში ეს მოლაპარაკებები სხვადასხვა მიზეზის გამო ჩიხში შევიდა. ამასთან, გასული თვის განმავლობაში უკრაინელებმა ბრძოლის ველზეც გარკვეულ წარმატებებს მიაღწიეს.
რუსები დღეში ხუთ ათას ადამიანს კარგავენ… არა დაჭრილს, არამედ დაღუპულს. ფაქტობრივად, ომის დეპარტამენტის მონაცემებით, ეს ერთ-ერთი პირველი კონფლიქტია ისტორიაში, სადაც სიკვდილიანობის მაჩვენებელი დაჭრილთა მაჩვენებელზე მაღალია – რუსეთის მხარეს. პირველად ისტორიაში, როდესაც დაღუპულთა რაოდენობა დაჭრილებზე მეტია. ამიტომ ამჟამად უკრაინელები მამაცურად და ეფექტიანად იბრძვიან.
რუსეთს ყოველთვის ჰქონდა შორ მანძილზე დარტყმების განხორციელების უნარი. თქვენ ხედავთ მათი ინტენსივობის ზრდას… თუმცა, როგორც თავად აღნიშნეთ, უკრაინელებიც საკმაოდ ეფექტიანები გახდნენ მათ წინააღმდეგ. ბოლო რამდენიმე თვის განმავლობაში მთავარი ცვლილება სწორედ ის არის, რომ უკრაინა სულ უფრო ეფექტიანად ახორციელებს შორ მანძილზე დარტყმებს რუსეთის სიღრმეში და რუსეთის ეკონომიკის კრიტიკულად მნიშვნელოვან ობიექტებზე.
ჩვენი როლია, თუ არსებობს გზა, რომ ეს ყველაფერი სამშვიდობო შეთანხმებით დასრულდეს, მას ხელი შევუწყოთ… რადგან საბოლოოდ ეს ომი მოლაპარაკებების გზით დასრულდება. თუმცა ეს რთულია, რადგან ომის დასასრულებლად ორივე მხარის მოთხოვნები ამ დრომდე ერთმანეთისგან ძალიან შორს დგას.
