უკრაინის არმია ანექსირებული ყირიმის რაიონში რუსეთის ლოგისტიკაზე შეტევებს აძლიერებს. სახმელეთო კორიდორის შემდეგ დარტყმის ქვეშ ნახევარკუნძულის მომარაგების საზღვაო გზებიც მოექცა.
უკრაინის შეიარაღებული ძალების უპილოტო სისტემების ძალების სარდლის, რობერტ ბროვდის — მეტსახელად „მადიარის“ — ცნობით, ბოლო სამი დღე-ღამის განმავლობაში აზოვის ზღვის აკვატორიაში 20-ზე მეტ რუსულ გემს შეუტიეს და დაწვეს. მათი უმეტესობა საწვავით დატვირთული ტანკერები იყო.
ოფიციალურად ინფორმაცია ჯერ დადასტურებული არ არის, თუმცა წინასწარი მონაცემები მის სანდოობაზე მიუთითებს, მომხდარის მასშტაბი კი შთამბეჭდავია.
ასეთი ერთდროული დანაკარგები რუსეთისა და საბჭოთა ფლოტს მეორე მსოფლიო ომის დაწყების შემდეგ არ განუცდია.
ტანკერები, მშრალტვირთმზიდი, ბორანი
სამშაბათს დილით „მადიარმა“ ინტერნეტში გამოაქვეყნა FPV-დრონებით გადაღებული ვიდეოები, რომლებშიც ჰაერიდან გემებზე განხორციელებული შეტევებია ასახული. ეს გემები, სავარაუდოდ, საწვავით დატვირთული ანექსირებული ყირიმისკენ მიემართებოდნენ.
გადაღება ღამის საათებში მიმდინარეობდა. კადრებით თუ ვიმსჯელებთ, 6-დან 7 ივლისის ღამეს უპილოტოების დარტყმების ქვეშ ათი გემი მოხვდა, თანაც პირველი მოხვედრის შემდეგ შეტევები მეორდებოდა. სულ მცირე რამდენიმე ტანკერზე ძლიერი ხანძარი გაჩნდა.
„მადიარის“ განცხადების შემდეგ უკრაინულმა პორტალმა Exilenova+-მა გამოაქვეყნა ახლო დისტანციიდან გადაღებული ობიექტური კონტროლის კადრები — მათზე გემზე გაჩენილი ძლიერი ხანძარი ჩანს.
შეტევის ქვეშ მოქცეული გემებიდან რვას „მადიარი“ დაახლოებით 7 ათასი ტონის წყალწყვითობის მქონე რუსულ ტანკერებად ასახელებს — „ვენერა-3“, „სანარ-1“, „სანარ-17“, „კლიმენა“, „ტეტი“, „ალექსეი სავრასოვი“, „პენელოპა“. კიდევ ერთი გემის სახელწოდება ზუსტდება, — დაწერა მან.
კიდევ ორი დაზიანებული გემი მშრალტვირთმზიდი და ქერჩის პორტში მყოფი ბორანი SKS One-ია. მშრალტვირთმზიდის სახელწოდება ჯერჯერობით არ სახელდება.
საიტ marinetraffic.com-ის მონაცემებით, სამგზავრო ბორანი SKS One კამერუნის დროშის ქვეშ ცურავს. მანამდე ის პალაუს რესპუბლიკას ეკუთვნოდა, თუმცა 2020 წელს ქვეყანამ მას დროშა ჩამოართვა ყირიმის ტერიტორიაზე მდებარე დახურულ პორტებში შესვლის გამო.
სამშაბათს საღამოს „მადიარმა“ მერვე ტანკერის სახელწოდება დააზუსტა — მისი ინფორმაციით, ეს არის MS Ivan Cheremisinov — „ივან ჩერემისინოვი“. თუმცა, რუსული წყაროების მონაცემებით, „ივან ჩერემისინოვი“ ტანკერი კი არა, მიწისშემწოვი გემია, რომელიც ფსკერის გასაღრმავებლად და მეჩხერ წყლებში სხვა გემების გასატარებლად გამოიყენება. ასეთ შემთხვევაში ეს ტანკერზე უფრო მნიშვნელოვანი დანაკარგია.
გარდა ამისა, უკრაინის შეიარაღებული ძალების უპილოტო სისტემების ძალების სარდალმა აზოვის ზღვაში კიდევ ორი რუსული ტანკერის დაზიანების შესახებაც განაცხადა. ამგვარად, მხოლოდ ერთი დღე-ღამის განმავლობაში დაზიანებული გემების საერთო რაოდენობამ 12-ს მიაღწია.
წინა დღეს რობერტ ბროვდი აცხადებდა პროექტ 15781-ის ორი დაზიანებული ტანკერის შესახებ, რომლებიც, მისი ცნობით, „ჩრდილოვან ფლოტს“ ეკუთვნოდნენ და „აზოვის ზღვით ტაგანროგის რაიონიდან ყირიმში თითოეული 7 ათას ტონა საწვავს — 200 სარკინიგზო ცისტერნის მოცულობას — აწვდიდა“.
მაგრამ ამით საქმე არ დასრულებულა. ოთხშაბათს დილით „მადიარმა“ განაცხადა, რომ უკრაინის შეიარაღებული ძალების უპილოტო სისტემების ძალებმა წარმატებით შეუტიეს კიდევ ცხრა რუსულ ტანკერს და ახალი ვიდეოც გამოაქვეყნა. სურათი დაახლოებით იგივეა — დრონები სამიზნეზე შედიან და გემის კიჩოზე მდებარე საჭის ჯიხურს უტევენ. თითოეული დარტყმა და თითოეული ტანკერი, რომელზეც შეტევა მოხდა, ცალკე არის დაფიქსირებული.
რუსეთის ხელისუფლებას დრონების მიერ ტანკერებზე, მშრალტვირთმზიდსა და ბორანზე განხორციელებული დარტყმების შესახებ კომენტარი არ გაუკეთებია. მხოლოდ როსტოვის ოლქის გუბერნატორმა იური სლიუსარმა განაცხადა ოთხშაბათს, რომ ტაგანროგის ყურეში უპილოტო საფრენი აპარატის შეტევის შედეგად ორი ტანკერი დაზიანდა. მისი მტკიცებით, ისინი ცარიელები იყვნენ და დონის როსტოვისკენ მიემართებოდნენ. ორი ადამიანი დაიჭრა, ერთ-ერთ გემზე კი ეკიპაჟის ევაკუაცია გახდა საჭირო, — დაწერა რეგიონის ხელმძღვანელმა Telegram-ში.
ჯერჯერობით უკრაინის შეიარაღებული ძალების მიერ რუსულ გემებზე წარმატებული შეტევის დადასტურება დამოუკიდებელი წყაროებიდან არ არსებობს. თუმცა დღემდე რობერტ ბროვდის მიერ გამოქვეყნებული არც ერთი ვიდეოჩანაწერი რუსულ ობიექტებზე თავდასხმების შესახებ გაყალბებულად არ უცვნიათ.
NASA-ს ონლაინპლატფორმაზე, რომელიც ხანძრების შესახებ მონაცემებს რეალურ დროში ასახავს რუკაზე, აზოვის ზღვაში, ქერჩის სრუტესთან ახლოს, ძლიერი თერმული ანომალია ფიქსირდება: დაახლოებით ერთ წერტილში ხანძრის მრავალი კერაა დაფიქსირებული.
Z-ბლოგერების რეაქცია
რუსულ პროსაომარ წყაროებს „მადიარის“ განცხადებებსა და ვიდეოჩანაწერების ნამდვილობაში, როგორც ჩანს, ეჭვი არ ეპარებათ.
„ამ ტანკერების გადაადგილების ორგანიზება ძალიან დამახასიათებელია — დაუცველი, მჭიდრო მასა გემებისა შუა ზღვაში, რომელიც უკრაინელი FP-2 დრონების ოპერატორებისთვის სამიზნეს წარმოადგენს, — წერს Telegram-არხი „Военный осведомитель“. — არც შავი ზღვის ფლოტის გემებისგან დაფარვა, რომელიც დიდი ხანია ძლივსღა საკუთარ თავს იცავს, არც ცეცხლის ჯგუფები თავად გემებზე. თუ ადრე ტანკების კოლონებით შედიოდნენ დრონების ქვეშ, ახლა, როგორც ჩანს, დრონების ქვეშ კილვატერული წყობით ვივლით“.
„შეიძლება, რა თქმა უნდა, იკითხო, რატომ არ იყო ახლოს შავი ზღვის ფლოტის გემები. მხოლოდ ისაა, რომ დღევანდელ მდგომარეობაში ისინი გაიმეორებდნენ სასაზღვრო სამსახურის გემების ბედს, რომლებსაც გაზაფხულზე იმავე დრონებით ანადგურებდნენ და ამით აკვატორიაში მათი ყოფნის ფაქტორს აუქმებდნენ“, — პასუხობს მიხაილ ზვინჩუკი, Telegram-არხ „Рыбарь“-ის ავტორი.
ის იხსენებს, რომ შავი ზღვის ფლოტი „ახლა ნოვოროსიისკშია ჩაკეტილი“ და თავადაც სვამს კითხვას: „სამ წელიწადში ნუთუ შეუძლებელი იყო, გემების ნაწილი მაინც დამატებით აღეჭურვათ ტყვიამფრქვევებით, გადასატანი საზენიტო-სარაკეტო კომპლექსებითა და სხვა საშუალებებით, რომლებითაც სავსებით შესაძლებელია დაბალ სიმაღლეზე მფრენი და შედარებით ნელი სამიზნეების აღმოჩენა და ჩამოგდება?“
უკრაინული შეტევები რუსეთის საზღვაო ლოგისტიკაზე ლოგიკური და მტკივნეული დარტყმაა ნავთობგადამუშავების შემცირებისა და საწვავის მწვავე დეფიციტის პირობებში, განსაკუთრებით ანექსირებულ ყირიმში.
უპილოტო სისტემების ძალებმა და უკრაინის შეიარაღებული ძალების სხვა ქვედანაყოფებმა ნახევარკუნძულის მომარაგების სახმელეთო კორიდორები უკვე ფაქტობრივად ცეცხლის კონტროლის ქვეშ მოაქციეს და ტექნიკური შესაძლებლობა აქვთ, საზღვაო გზებიც გადაკვეთონ.
ივნისის ბოლოს ვლადიმირ პუტინმა ყირიმის საწვავზე ყოველთვიური მოთხოვნა 70 ათას ტონად შეაფასა და პირობა დადო, რომ ნახევარკუნძულს საწვავით უზრუნველყოფდა — როგორც სახმელეთო, ისე საზღვაო მიწოდებების გაზრდით.
აზოვის ზღვაში უკრაინის შეიარაღებული ძალების მიერ დაზიანებული რუსული ტანკერები შესაძლოა დაახლოებით ორჯერ მეტ მოცულობის საწვავს გადაზიდავდნენ.
თუ რობერტ ბროვდის ინფორმაცია სიმართლეს შეესაბამება, რუსეთის ფლოტის ერთდროული დანაკარგების მასშტაბი კოლოსალურად გამოიყურება.
ზღვაზე უფრო ტრაგიკული მოვლენებიც მომხდარა და უფრო მნიშვნელოვანი ზიანიც ყოფილა — როგორც საბრძოლო მოქმედებების დროს, ისე წვრთნებისას — მაგრამ სამ დღეში 20-ზე მეტი მსხვილტონაჟიანი გემი — ასეთი რამ თანამედროვე რუსეთის ისტორიას ჯერ არ ახსოვს.
