უკრაინის 33 წლის მოქალაქე გერმანიის ფედერალურ მიწა თიურინგიაში დააკავეს. გამოძიების ვერსიით, ის უცხო ქვეყნის სადაზვერვო სამსახურის აგენტის სახით ბავარიაში მდებარე სამხედრო-სამრეწველო საწარმოს ფოტოებს იღებდა, რათა იქ დივერსია მოემზადებინა.მას სამხედრო-სამრეწველო კომპლექსის საწარმოში დივერსიის მომზადებაში მონაწილეობა ედება ბრალად. ამის შესახებ ხუთშაბათს, 6 ივლისს, მიუნხენის პროკურატურამ და ბავარიის კრიმინალური პოლიციის სამმართველომ განაცხადეს.
გამოძიების ვერსიით, ივნისში უკრაინის მოქალაქემ უცხო ქვეყნის სადაზვერვო სამსახურის დავალებით ბავარიაში მდებარე თავდაცვის მრეწველობის საწარმოს შენობებს ფოტოები გადაუღო და გადაღებული მასალა თავის კურატორს გადასცა. როგორც სამართალდამცველები აცხადებენ, ამის მიზანი საწარმოში დივერსიის მომზადება იყო. რომელი ქვეყნის დაზვერვა იდგა ამ ოპერაციის უკან, არ სახელდება.
მიუნხენის რაიონულმა სასამართლომ ეჭვმიტანილის დაკავების ორდერი გასცა. ის სასამართლო პროცესამდე პატიმრობაში დატოვეს. გამოძიების ინფორმაციით, 33 წლის უკრაინელი ე.წ. დაბალი რგოლის აგენტია — ასეთ პირებს შედარებით მარტივი ოპერაციების შესასრულებლად ქირაობენ და იყენებენ.
გერმანიაში სავარაუდო ჯაშუშების დაკავების სხვა შემთხვევები
აპრილში ბავარიაში, ავტომობილის გეგმური შემოწმებისას, უკრაინის 43 წლისა და ლატვიის 45 წლის მოქალაქეები დააკავეს. პოლიციამ მათ მანქანაში ყალბი პირადობის მოწმობები, კამერები, დრონი, GPS-ტრეკერები, რადიოსადგურები, რამდენიმე მობილური ტელეფონი და SIM-ბარათები აღმოაჩინა.
მამაკაცებს დივერსიის მიზნით ჯაშუშობაში წაუყენეს ბრალი და პატიმრობა შეუფარდეს.
იმავე თვეში ბერლინში დააკავეს ყაზახეთის მოქალაქე სერგეი კ., რომელიც რუსეთის სასარგებლოდ ჯაშუშობაშია ეჭვმიტანილი. გამოძიების თანახმად, ის თავის კურატორს სხვადასხვა ინფორმაციას აწვდიდა, მათ შორის გერმანიაში სამხედრო ტექნიკის კოლონების ფოტოებსა და დივერსიების შესაძლო გეგმებს.
2024 წლის იანვარში კი გერმანიის ფედერალურმა პროკურატურამ სამ მამაკაცს ბრალი წაუყენა ქვეყანაში მდებარე რამდენიმე ობიექტის შესახებ მონაცემების შეგროვებაში, მათზე შემდგომში აფეთქებებისა და ხანძრების მოწყობის მიზნით.
საუბარია ბავარიაში მდებარე სამხედრო პოლიგონზე, საბრძოლო მასალების მწარმოებელ ქარხანასა და რკინიგზის სადგურზე, საიდანაც უკრაინაში სამხედრო დახმარება იგზავნებოდა.
