სომხეთის ისტორიაში უპრეცედენტო სასამართლო პროცესი დაიწყო, რომელზეც ბრალდებულის სახით ყოველთა სომეხთა კათოლიკოსი, გარეგინ II და უმაღლესი სასულიერო საბჭოს კიდევ 6 ეპისკოპოსი წარსდგნენ.
მოსამართლემ სხდომის დახურვის გადაწყვეტილება მიიღო, რაც საქმეში პირადი ცხოვრების შესახებ მონაცემების არსებობით დაასაბუთა და მედიის წარმომადგენლებს დარბაზი დაატოვებინა.
სხდომის დაწყებიდან მალევე ცნობილი გახდა, რომ მოსამართლე აკოპ მანუკიანმა თვითაცილების შესახებ განაცხადა იმ მიზეზით, რომ წარსულში თავად იყო ლიცენზირებული ადვოკატი და ლიცენზია თავის დროზე სწორედ კათალისოსის ადვოკატმა გადასცა. მოსამართლემ ჩათვალა, რომ ამ ფაქტს შესაძლოა საზოგადოებაში ეჭვები გაეჩინა მისი მიუკერძოებლობის მიმართ. ამიტომ, მიიღო გადაწყვეტილება, საერთოდ ჩამოშორებოდა ამ სკანდალურ პროცესს. შესაბამისად, პირველი პროცესი ჩაიშალა და გადაიდო, რის შემდეგაც საქმე ხელახლა გადაანაწილდება.
სომხური საინფორმაციო პლატფორმების ცნობით, სასამართლოს შენობასთან შეკრებილები პატრიარქს აპლოდისმენტებითა და სკანდირებით — „პატრიარქო!“ შეხვდნენ. სამღვდელოებამ შეასრულა ტრადიციული შარაკანი „შეუნარჩუნე შეურყევლად წმინდა ეჩმიაძინის საყდარი“ და წაიკითხა ლოცვა „მამაო ჩვენო“.
სომხეთის გენერალურმა პროკურატურამ სისხლის სამართლის წარმოება ჯერ კიდევ თებერვალში დაიწყო, ხოლო საბოლოო ბრალდება ივლისის ბოლოს წარადგინა. გარეგინ II-ს და ეპისკოპოსებს ბრალად ედებათ სასამართლო აქტის განზრახ შეუსრულებლობა და მისი აღსრულებისთვის ხელის შეშლა სამსახურებრივი უფლებამოსილების გამოყენებით.
კონფლიქტის საფუძველი ყოფილი სასულიერო პირის, არმან (გევორგ) საროიანის საქმეა. ეკლესიამ ეპისკოპოსი საროიანი დაუმორჩილებლობისა და აღთქმის დარღვევის გამო თანამდებობიდან გადააყენა და საერო სტატუსამდე დაიყვანა.
სომხური ოპოზიციური წყაროების ცნობით, საროიანი ერთ-ერთია იმ სასულიერო პირთაგან, ვინც მხარს უჭერდა პრემიერ-მინისტრ ნიკოლ ფაშინიანის სამთავრობო კამპანიას. საროიანმა ეკლესიის გადაწყვეტილება საერო სასამართლოში გაასაჩივრა და მოითხოვა ეპარქიის ხელმძღვანელის პოსტზე აღდგენა. სამოქალაქო სასამართლომ დააკმაყოფილა სარჩელი და უზრუნველყოფის ღონისძიების სახით აუკრძალა ეკლესიას მისი საქმიანობისთვის ხელის შეშლა. თუმცა, კათოლიკოსმა და უმაღლესმა საბჭომ გამოსცეს განკარგულება მისი საბოლოო განკვეთისა და საყდრიდან ჩამოშორების შესახებ, რაც პროკურატურამ კანონიერი სასამართლო გადაწყვეტილების საბოტაჟად მიიჩნია.
კათოლიკოსის ადვოკატი, არა ზოგრაბიანი აცხადებს, რომ სახელმწიფოს ჩარევა კათოლიკოსის კანონიკურ გადაწყვეტილებებში ეკლესიის ავტონომიისა და რელიგიის თავისუფლების კონსტიტუციური პრინციპების უხეში დარღვევაა. მისი თქმით, პატრიარქს სისხლის სამართლის წესით სდევნიან მისი პირდაპირი საეკლესიო მოვალეობის შესრულებისთვის.
დამკვირვებლები და სომხური მედია აღნიშნავენ, რომ ეს სასამართლო პროცესი ნიკოლ ფაშინიანის მთავრობასა და სომხურ სამოციქულო ეკლესიას შორის არსებული მრავალთვიანი მწვავე დაპირისპირების პიკია.