როცა ჩვენზე ძალადობა ნახა, და ვერაფრით გვეხმარებოდა, თვითმკვლელობის მიზნით წავიდა აივნისკენ, რა დროსაც დააკავეს – ამის შესახებ თამაზ ელიზბარაშვილის ადვოკატმა, იაკო სირანაშვილმა TV პირველთან საუბრისას განაცხადა.
“ბატონი თამაზი მას შემდეგ დააკავეს, რაც ჩემზე ძალადობა მოხდა. მან როცა ნახა ამდენი ძალადობა, ჩემზე ჩაწიხლვა, მის მეუღლეზე ძალადობა, ბავშვების ტირილი, ამდენი ძალადობის შემყურე კაცი გადაირია დააპირა თვითმკვლელობა. რადგან როცა ნახა რომ ვერაფრით გვეხმარებოდა, წავიდა აივნისკენ თვითმკვლელობის მიზნით და დააკავეს 173 -ე მუხლით, ეს არის დაუმორჩილებლობის მუხლი” – განაცხადა ადვოკატმა, TV პირველთან საუბრისას.
ბიზნესმენი თამაზ ელიზბარაშვილი საკუთარ საცხოვრებელ ბინაში გუშინ საღამოს დააკავეს. ელიზბარაშვილი სამართალდამცველებმა ხელბორკილით პოლიციის ავტომობილში ჩასვეს. ადგილზე ხმაურიც იყო.
მანამდე, მისი ბინის ჩხრეკის ოპერაცია მიმდინარეობდა. როგორც ცნობილია, სამართალდამცველები იარაღს ეძებდნენ. საგამოძიებო მოქმედებებს თამაზ ელიზბარაშვილის ადვოკატიც ესწრებოდა, რომელიც პროცესს სოციალურ ქსელში ლაივ-რეჟიმში აშუქებდა, თუმცა, მას შემდეგ, რაც სახლში სამართალდამცველები ერთდროულად შევიდნენ, გადაღების შეწყვეტა მოსთხოვეს.
სახლის ჩხრეკამდე კი ელიზბარაშვილის ავტომობილი გაჩხრიკეს, სადაც ასევე ცეცხლსასროლ იარაღს ეძებდნენ.