გერმანიამ, საფრანგეთმა და პოლონეთმა ლაიფციგ/ჰალეს აეროპორტის ტერიტორიაზე ასაფეთქებელი ნივთიერებით აღჭურვილი დრონით თავდასხმის მცდელობის შემდეგ განაცხადეს, რომ მოსკოვის მხრიდან ჰიბრიდულ საფრთხეებზე ერთობლივად უპასუხებენ. ამის შესახებ სამი ქვეყნის საგარეო საქმეთა მინისტრებმა ხუთშაბათს, 3 სექტემბერს, თიურინგიის ქალაქ ვაიმარში გამართულ შეხვედრაზე განაცხადეს.
„ჩვენ ერთად გვინდა დავიცვათ და ჩამოვაყალიბოთ ევროპული მშვიდობის წესრიგი, რომლის მიღწევაც ჩვენ, ევროპელებს, XX საუკუნეში უდიდესი მსხვერპლის ფასად დაგვიჯდა“, — განაცხადა გერმანიის საგარეო საქმეთა მინისტრმა იოჰან ვადეფულმა ფრანგ და პოლონელ კოლეგებთან — ჟან-ნოელ ბაროსა და რადოსლავ სიკორსკისთან შეხვედრის შემდეგ.
ვადეფულის თქმით, მინისტრები შეთანხმდნენ, რომ „ევროპაში ახალი მშვიდობისკენ გზა მხოლოდ უკრაინის მტკიცე მხარდაჭერითა და მოსკოვზე თანმიმდევრული ზეწოლით არის შესაძლებელი“.
სოლიდარობის გამოვლინება
იოჰან ვადეფულმა ლაიფციგის აეროპორტში მომხდარ ინციდენტზე ევროპისა და სხვა ქვეყნების რეაქციას სოლიდარობის შთამბეჭდავი გამოვლინება უწოდა.
„ვფიქრობ, ეს მოსკოვშიც შეუმჩნეველი არ დარჩენიათ. გერმანია ამისთვის მადლობელია“, — განაცხადა მინისტრმა.
ბერლინი ლაიფციგში თავდასხმის მცდელობაზე პასუხისმგებლობას მოსკოვს აკისრებს. რუსეთი ბრალდებას უარყოფს.
დიალოგი მხოლოდ გარკვეული პირობებით
კრემლის განცხადების კომენტირებისას, რომლის თანახმადაც მოსკოვს დიპლომატიური ურთიერთობების არსებული დონის შენარჩუნება სურს, ვადეფულმა თქვა: „გერმანიას ჩვენს ურთიერთობებთან დაკავშირებით ილუზიები არ აქვს“.
მისი თქმით, გერმანია ყოველთვის მზად იყო რუსეთთან გონივრული დიალოგისთვის, თუმცა ამის წინაპირობა უნდა იყოს უკრაინის წინააღმდეგ აგრესიული ომის შეწყვეტა და რუსეთის მხრიდან „ჩვენსა და ჩვენს მოკავშირეებზე ნებისმიერი სახის თავდასხმაზე უარის თქმა“.
პოლონეთის საგარეო საქმეთა მინისტრმა რადოსლავ სიკორსკიმ განაცხადა, რომ პოლონეთი რუსეთის მიმართ გერმანიის გადაწყვეტილებებს მხარს უჭერს. მან გაიხსენა, რომ ვარშავამაც გამოიძახა რუსეთის ელჩი, „რათა ეჩვენებინა, რომ ჩვენ რუსეთის ტერორიზმის წინააღმდეგი ვართ“.
სიკორსკიმ აღნიშნა, რომ მას არ უყვარს ტერმინ „ჰიბრიდული ომის“ გამოყენება, რადგან ყველას არ ესმის, რას ნიშნავს ის.
„ეს ნიშნავს აგრესიას, რომელიც სრულმასშტაბიანი შეჭრის ზღვარს ქვემოთ რჩება“, — განმარტა პოლონეთის საგარეო საქმეთა მინისტრმა.
ჰიბრიდული საფრთხე გულისხმობს სამხედრო, ეკონომიკური, სადაზვერვო და პროპაგანდისტული საშუალებების ერთობლიობას, რომელთა გამოყენებითაც შესაძლებელია საზოგადოებრივ აზრზე ზემოქმედება. ასეთ საშუალებებს მიეკუთვნება სახელმწიფოს მიერ კონტროლირებადი კიბერთავდასხმებიც.
საფრანგეთის სოლიდარული ნაბიჯები
საფრანგეთის საგარეო საქმეთა მინისტრმა ჟან-ნოელ ბარომ, თავის მხრივ, განაცხადა, რომ პარიზმაც გამოიძახა რუსეთის წარმომადგენელი ლაიფციგში რუსეთის ქმედებებთან დაკავშირებით.
„ეს სერიოზული აქტია, როდესაც ევროპის შუაგულში სატრანსპორტო ინფრასტრუქტურას ესხმიან თავს. საფრანგეთი, გერმანია და პოლონეთი დღეს, როგორც არასდროს, მტკიცედ არიან განწყობილი, ერთობლივად იმოქმედონ სუვერენული, უსაფრთხო და აყვავებული ევროპისთვის, რომელიც საკუთარი ღირებულებებით ამაყობს“, — განაცხადა ფრანგმა მინისტრმა.
ე.წ. „ვაიმარის სამკუთხედი“, რომელშიც გერმანია, საფრანგეთი და პოლონეთი შედიან, 35 წლის წინ ვაიმარში ამ სამი ქვეყნის მაშინდელი საგარეო საქმეთა მინისტრების ინიციატივით შეიქმნა.
თავდაპირველად მისი მთავარი მიზანი პოლონეთისა და აღმოსავლეთ ევროპის სხვა ქვეყნების ევროკავშირსა და ნატოსთან დაახლოება იყო.