„ევროკავშირი ყურადღებით აკვირდება ამ სარჩელებს ხუთი მთავარი ოპოზიციური პარტიის აკრძალვის შესახებ, მათ შორის, რა თქმა უნდა, უახლეს მოვლენებს საქართველოს საკონსტიტუციო სასამართლოში ამ საქმესთან დაკავშირებით.
ეს მოვლენები, ბოლოდროინდელ საკანონმდებლო ცვლილებებთან და ოპოზიციური პარტიების აკრძალვის შესახებ ადრინდელ განცხადებებთან ერთად, მიუთითებს მართლმსაჯულების სისტემის შემაშფოთებელ ინსტრუმენტალიზაციაზე. ეს რისკის ქვეშ აყენებს ძირითად თავისუფლებებს, დემოკრატიულ პლურალიზმს და სამართლიან პოლიტიკურ კონკურენციას. ასე რომ, ჩვენ ძალიან ყურადღებით ვადევნებთ თვალს ამას და გავაგრძელებთ ამ სარჩელის მონიტორინგს.“ – განაცხადა „ევროსკოპის“ კითხვის პასუხად ევროკომისიის პრესსპიკერმა კრისტიან უიგანდმა დღეს გამართულ ბრიფინგზე.
მან ასევე უპასუხა „ევროსკოპის“ კითხვას ჟურნალისტ ვახო სანაიას დაკავებასთან დაკავშირებით:
„რაც შემიძლია ზოგადი ტერმინებით ვთქვა, არის ის, რომ ჩვენ ძალიან ხმამაღლა ვაფიქსირებდით პოზიციას „ქართული ოცნების“ ქმედებებთან დაკავშირებით პოლიტიკური ოპოზიციის, ჟურნალისტებისა და აქტივისტების ჩახშობის მიმართულებით. ისინი, სამწუხაროდ, ცდილობენ გააგრძელონ ან განაგრძონ სამოქალაქო სივრცის შეზღუდვა. საქართველოს ხელისუფლებამ დაუყოვნებლივ უნდა გაათავისუფლოს უსამართლოდ დაკავებული პოლიტიკოსები, ჟურნალისტები და აქტივისტები და უკან გააწვიოს რეპრესიული კანონმდებლობა“ – განაცხადა კრისტიან უიგანდმა.