აშშ-ის კონგრესში რუსეთის წინააღმდეგ ე.წ. „ჯოჯოხეთურ“ სანქციებს მხარს უჭერენ, თუმცა ახალი კანონპროექტის შესაძლო შედეგებზე დავობენ. კონგრესმენები შიშობენ, რომ ახალი ტარიფები ფასების ზრდას გამოიწვევს და ამერიკელ მომხმარებლებს დააზარალებს, იუწყება Bloomberg.
აშშ-ის წარმომადგენელთა პალატაში რუსეთის წინააღმდეგ სანქციების შესახებ კანონპროექტის განხილვა შესაძლოა სულ მცირე ნოემბრის კონგრესის არჩევნებამდე გაჭიანურდეს. პალატის სპიკერმა მაიკ ჯონსონმა განაცხადა, რომ დოკუმენტი კითხვებს იწვევს არა მხოლოდ დემოკრატებში, არამედ ზოგიერთ რესპუბლიკელშიც, იუწყება Bloomberg.
„ჩვენ ყველანი მხარს ვუჭერთ რუსეთის წინააღმდეგ სანქციებს, მაგრამ ფორმულა სწორად უნდა იყოს შერჩეული“, — განაცხადა ჯონსონმა.
კანონპროექტი მანამდე სწრაფად დაამტკიცა აშშ-ის სენატმა, თუმცა წარმომადგენელთა პალატაში შიშობენ, რომ პრეზიდენტ დონალდ ტრამპისთვის სატარიფო უფლებამოსილების გაფართოებამ შესაძლოა ნავთობის გაძვირება გამოიწვიოს და უარყოფითად იმოქმედოს აშშ-ის სავაჭრო პარტნიორებზე.
ინიციატივის თანახმად, ტრამპს შეეძლება 100%-იანი ტარიფები დაუწესოს რუსული ნავთობისა და გაზის ხუთ უმსხვილეს მყიდველს, ასევე ხუთ ქვეყანას, რომლებიც რუსეთს სანქციების გვერდის ავლაში ეხმარებიან. პოტენციურ სამიზნეებად, პირველ რიგში, ჩინეთი, ინდოეთი და თურქეთი სახელდება.
კონგრესში ფასების ზრდის ეშინიათ
წარმომადგენელთა პალატის საგარეო ურთიერთობათა კომიტეტის თავმჯდომარე, რესპუბლიკელი ბრაიან მასტი აცხადებს, რომ ამჟამად სწავლობენ, რა გავლენა შეიძლება მოახდინოს ინიციატივამ საწვავის ბაზარზე.
მისი თქმით, თუ ინდოეთი და სხვა ქვეყნები რუსულ ნედლეულზე უარს იტყვიან და ალტერნატიულ მომწოდებლებზე გადაერთვებიან, ამან შესაძლოა არჩევნების წინ ბენზინის ფასები გაზარდოს.
დემოკრატები დოკუმენტს სხვა მიზეზით ეწინააღმდეგებიან. მათი შეფასებით, კანონპროექტმა შესაძლოა ტრამპის ადმინისტრაციას პრაქტიკულად შეუზღუდავი ტარიფების გამოყენებისთვის სამართლებრივი საფუძველი მისცეს.
საგარეო ურთიერთობათა კომიტეტის წარმომადგენელმა გრეგორი მიქსმა განაცხადა, რომ პრეზიდენტისთვის ისეთი უფლებამოსილების გადაცემას ცდილობენ, რომელიც მას ამჟამად არ აქვს. დემოკრატმა ბრედ შნაიდერმა კი ტარიფებთან დაკავშირებულ დებულებას „მიუღებელი“ უწოდა.
ბიზნესიც წინააღმდეგია
კანონპროექტი გააკრიტიკეს მსხვილმა ამერიკულმა კომპანიებმაც, მათ შორის ExxonMobil-მა, General Electric-მა, Ford-მა და Pfizer-მა, ასევე აშშ-ის სავაჭრო პალატამ.
ბიზნესის წარმომადგენლებმა კონგრესს წერილი გაუგზავნეს, რომელშიც საკუთარი პრეტენზიები ჩამოაყალიბეს.
Retail Industry Leaders-ის წარმომადგენლის, ელენ ჯეკსონის თქმით, კომპანიები შეშფოთებული არიან, რა გავლენას მოახდენს ახალი ტარიფები მომხმარებლებზე.
„ჩვენ გვაშფოთებს, რომ კანონპროექტის ნაწილმა შეიძლება მომხმარებლებისთვის გაუთვალისწინებელი შედეგები გამოიწვიოს, რადგან ის ჩვენი სავაჭრო პარტნიორებისა და მოკავშირეების წინააღმდეგ ახალი, მასშტაბური ტარიფების დაწესების შესაძლებლობას იძლევა“, — განაცხადა მან.