კონრად ადენაუერის ფონდი თბილისში ოფისს ხურავს, მიზეზად კი საქართველოს მთავრობის მიერ მათი საქმიანობის შეზღუდვას ასახელებს.
განცხადებაში, რომელსაც ფონდი ავრცელებს, ხაზგასმულია, რომ ოფისის დახურვა არის საქართველოს მთავრობის მიერ შექმნილი პოლიტიკური და სამართლებრივი ჩარჩო-პირობების უშუალო შედეგი, რომელთა პირობებშიც KAS ვეღარ ახერხებს თავისი ძირითადი მისიის შესრულებას.
ფონდი განმარტავს, რომ 2026 წლის 28 ივლისს საქართველოს მთავრობის ადმინისტრაციამ უარყო KAS მიერ „გრანტების შესახებ კანონის“ საფუძველზე წარდგენილი განაცხადები მისი პროექტების დასაფინანსებლად. გერმანიის ფედერალური მთავრობის მხრიდან გაწეულმა ინტენსიურმა ძალისხმევამაც, რათა ახალი ჩარჩოს პირობებში მუშაობის გაგრძელება გამხდარიყო შესაძლებელი, შედეგი ვერ გამოიღო.
„პროექტების დამტკიცება შესაძლებელი ჩანდა მხოლოდ იმ შემთხვევაში, თუ ისინი აღარ შეესაბამებოდა ფონდის პოლიტიკურ ხასიათსა და მისიას. საქართველოში მხოლოდ ყოფნა, ჩვენი რეალური მისიის განხორციელების შესაძლებლობის გარეშე, კონრად ადენაუერის ფონდისთვის არ წარმოადგენს მისაღებ ალტერნატივას. შესაბამისად, ოფისის ლიკვიდაცია არის საქართველოს მთავრობის მიერ ჩვენი მუშაობის შეზღუდვის გარდაუვალი შედეგი.
ფონდი რჩება საქართველოსა და თავისი მრავალწლიანი პარტნიორების ერთგული. იგი ინარჩუნებს თავის რეგისტრაციას ქვეყანაში, როგორც იურიდიული პირი, რათა პოლიტიკური ჩარჩო-პირობების შეცვლის შემთხვევაში შესაძლებელი გახდეს დაბრუნება“ – ნათქვამია კონრად ადენაუერის ფონდის განცხადებაში.
კონრად ადენაუერის ფონდი საქართველოში 2003 წლიდან მუშაობს დემოკრატიის, კანონის უზენაესობის, საპარლამენტო განვითარებისა და ევროპული ურთიერთგაგების ხელშესაწყობად. მის საქმიანობას აფინანსებენ გერმანიის ეკონომიკური თანამშრომლობისა და განვითარების ფედერალური სამინისტრო, საგარეო საქმეთა სამინისტრო და ევროკავშირი.
ფონდი ხელს უწყობს სახელმწიფო ინსტიტუტების, განსაკუთრებით საპარლამენტო სისტემისა და სამართლებრივი გარემოს გაძლიერებას. სტიპენდიებითა და ყოველთვიური ფინანსური დახმარებით უზრუნველყოფს ნიჭიერ ქართველ სტუდენტებსა და ახალგაზრდა მკვლევარებს. ატარებს სემინარებს, დისკუსიებსა და ვორქშოფებს ახალგაზრდა ლიდერებისთვის პოლიტიკის, ევროკავშირისა და დემოკრატიული ღირებულებების შესახებ. KAS , პარტნიორებთან ერთად აქტიურად უჭერდა მხარს და ეხმარებოდა საქართველოს ევროპული რეფორმების განხორციელებაში.