რუსეთის შინაგან საქმეთა სამინისტრომ მოამზადა მთავრობის დადგენილების პროექტი, რომლის თანახმად, დსთ-ის ქვეყნებისა და საქართველოს იმ მოქალაქეებს, რომლებიც რუსეთში სატვირთო ავტომობილებით საერთაშორისო გადაზიდვებს ახორციელებენ, უვიზოდ ყოფნის 180-დღიანი შეღავათიანი ვადა გაუუქმდებათ, თუ მათი ქვეყანა ევროკავშირში გაწევრიანების გზას დაადგება.
რუსულ მედიაში გავრცელებული ინფორმაციით, ამგვარი საგარეო კურსის მქონე ქვეყნების მძღოლებისთვის რუსეთის ტერიტორიაზე ყოფნის უფლება მკაცრად შეიზღუდება და სტანდარტულ, 90-დღიან ლიმიტს დაუბრუნდება.
რუსეთის შსს-ს მიერ მომზადებული დოკუმენტის განმარტებით ბარათში ღიად არის ნათქვამი, რომ პოსტსაბჭოთა ქვეყნების მისწრაფება ევროკავშირისკენ „არ შეესაბამება ევრაზიული ეკონომიკური კავშირის ინტერესებს“. მოსკოვი ამ ნაბიჯს გეოპოლიტიკური კონტექსტით ხსნის და აცხადებს, რომ დასავლურ სტრუქტურებში ინტეგრაცია „საფრთხეს უქმნის რუსეთის ფედერაციის ეროვნულ უსაფრთხოებას“.
ამ დრომდე, დსთ-ის წევრი ქვეყნებისა და საქართველოს მძღოლები რუსეთში სპეციალური, გაფართოებული რეჟიმით სარგებლობდნენ, რაც მათ საშუალებას აძლევდა, ნახევარი წლის განმავლობაში შეუფერხებლად ემუშავათ ქვეყნის შიგნით არსებულ ლოგისტიკურ მარშრუტებზე.
ანალიტიკოსები მიიჩნევენ, რომ ეს არის მოსკოვის მორიგი ეკონომიკური ბერკეტი იმ მეზობელი ქვეყნების წინააღმდეგ, რომლებიც დასავლურ ვექტორს ირჩევენ. ინიციატივა ამჟამად განხილვის სტადიაშია.