Flydubai-ის რეისზე მომხდარი თავდასხმის შემდეგ, საერთაშორისო მედიის ყურადღების ცენტრში მოექცა ბორტზე მყოფი მგზავრი, პროფესიით ექიმი-სტომატოლოგი შოთა მუსაევი. ქართველი ებრაელი მუსაევი წარმოშობით საქართველოდანაა. უცხოური მედიასაშუალებები (CNN, The Guardian, Ynet, The Times of Israel) დეტალურად აღწერენ მის როლს თავდამსხმელის გაუვნებელყოფასა და კაპიტნის გადარჩენაში.
როგორც The Times of Israel აღნიშნავს, შოთა მუსაევი იყო ერთადერთი ექიმი რეისზე, რომელმაც დაჭრილ კაპიტანს პირველადი დახმარება აღმოუჩინა.
ისრაელში დაბრუნების შემდეგ, მუსაევმა მედიასთან საუბრისას დეტალები გაიხსენა.
„როდესაც ყვირილი გავიგონე, სულ რაღაც 10 წამში წინ გავიქეცი — არავის დავლოდებივარ, რადგან მივხვდი, რომ თავდამსხმელთან საბრძოლველად მივრბოდი. კაბინაში შესვლისას დავინახეთ, რომ თავდამსხმელი პილოტს ზემოდან ეჯდა იატაკზე და დანას ურტყამდა… ის მთლიანად ჭრილობებით იყო დაფარული – თავი, ხელები – ისინი პრაქტიკულად დასერილი ჰქონდა… მან ბევრი სისხლი დაკარგა და ძალიან ცუდ მდგომარეობაში იყო. მამაცი ადამიანების დახმარებით თავდამსხმელი დავაკავეთ და ხელ-ფეხი შევუკარით, მე კი სისხლდენის შეჩერება და არტერიული წნევის სტაბილიზაცია შევძელი. მთელი ამ დროის განმავლობაში დაჭრილი პილოტი ლოცულობდა და თავის ოჯახზე გველაპარაკებოდა, სანამ თვითმფრინავი კრიტიკულ სიმაღლეს კარგავდა“ – ციტირებენ მუსაევს უცხოური მედიები.
შოთა მუსაევი – ქართველი ებრაელი სტომატოლოგი, ისრაელში, რიშონ-ლე-ციონში ცხოვრობს და თავის სამედიცინო პრაქტიკას უძღვება. ის დუბაიდან კონფერენციიდან ბრუნდებოდა, როდესაც რეისზე ინციდენტი მოხდა.
შეგახსენებთ, ინციდენტი მოხდა ავიაკომპანია Flydubai-ის რეისზე FZ1073, რომელიც ასრულებდა რეგულარულ ფრენას დუბაიდან თელ-ავივის (ისრაელი) მიმართულებით. ბორტზე იმყოფებოდა 174 მგზავრი (მათი უმეტესობა ისრაელის მოქალაქე) და ეკიპაჟის წევრები.
ფრენიდან დაახლოებით ორ საათში, როდესაც თვითმფრინავი საუდის არაბეთის საჰაერო სივრცეში იმყოფებოდა, კაბინაში მყოფმა ომანელმა მეორე პილოტმა მოულოდნელად დანით თავდასხმა განახორციელა ხომალდის კაპიტანზე — 39 წლის ინდოელ პილოტზე, სმიტ მაჩჰარზე. თავდამსხმელის მიზანი თვითმფრინავის ჩამოგდება იყო.
კაბინაში ფიზიკური დაპირისპირებისა და მართვის სისტემის დაზიანების გამო, ლაინერმა მკვეთრი ვარდნა დაიწყო. ფრენის მონაცემების მიხედვით, თვითმფრინავმა სულ რაღაც 29-დან 35 წამში დაკარგა 14 000-დან 17 400 ფუტამდე (დაახლოებით 4 200 – 5 300 მეტრი) სიმაღლე. სალონში ამ დროს სრული ქაოსი, ყვირილი და ტირილი იყო, მგზავრები დარწმუნებულები იყვნენ, რომ იღუპებოდნენ.
მიუხედავად იმისა, რომ კაპიტანს თავისა და ხელების არეში მძიმე, ღრმა ჭრილობები ჰქონდა მიყენებული და სისხლისგან იცლებოდა, მან უკანასკნელი ძალებით მოახერხა კაბინის კარის ელექტრონული საკეტის განბლოკვა. სწორედ ამან მისცა მგზავრებს შიგნით შესვლის საშუალება.
სალონში ყვირილის გაგონებისთანავე რამდენიმე მგზავრი კაბინისკენ გაიქცა. მათ თავდამსხმელი იატაკზე დააგდეს და მისი გაკოჭვა ბორტზე არსებული ყურსასმენების სადენებითა და პლასტმასის სამაგრებით
მოახერხეს. პარალელურად, ბორტზე მყოფმა სათადარიგო პილოტებმა, რომლებიც რეისით მგზავრობდნენ, მართვა თავის თავზე აიღეს.
ამ დროს შოთა მუსაევმა, როგორც ბორტზე მყოფმა ერთადერთმა ექიმმა, პირველადი დახმარების ნაკრებით კაპიტანს სისხლდენა შეუჩერა და წნევა დაუსტაბილურა.
თვითმფრინავმა საგანგებო დაშვების კოდები (Squawk 7700 და ტერორისტული საფრთხის კოდი 7500) გადასცა დისპეტჩერებს. ლაინერი საუდის არაბეთის ჩრდილო-დასავლეთით მდებარე ტაბუკის აეროპორტში საგანგებოდ დაეშვა. კაპიტანი მაშინვე საავადმყოფოში გადაიყვანეს, სადაც სასწრაფო ოპერაცია ჩაუტარდა და გადარჩა. თავდამსხმელი საუდის არაბეთის სამართალდამცავებმა დააკავეს. მგზავრები კი მოგვიანებით, სარეზერვო რეისით ისრაელში უსაფრთხოდ დააბრუნეს.