უკრაინის პრეზიდენტმა ვოლოდიმირ ზელენსკიმ საგანგებო ვიდეომიმართვაში განაცხადა, რომ ქვეყნის სპეცსამსახურებმა რუსეთის მხრიდან მოსალოდნელი ახალი, მასშტაბური საჰაერო თავდასხმის შესახებ განახლებული სადაზვერვო მონაცემები მიიღეს. მან მოქალაქეებს უსაფრთხოების ზომების მაქსიმალური დაცვისკენ, ხოლო დასავლელ მოკავშირეებს სამხედრო დახმარების სასწრაფოდ გააქტიურებისკენ მოუწოდა.
„მივიღეთ განახლებული სადაზვერვო მონაცემები იმის შესახებ, რომ რუსეთი მასირებული დარტყმისთვის ემზადება. უკრაინის შესაბამისი სამსახურები და ჩვენი სამხედრო-საჰაერო ძალები მზად არიან პასუხისთვის იმ ფარგლებში, რის საშუალებასაც ჩვენი თავდაცვითი რესურსები გვაძლევს“, — აღნიშნა ზელენსკიმ.
მან განსაკუთრებული ყურადღება უსაფრთხოების წესების დაცვაზე გაამახვილა და მოსახლეობას მიმართა, არავითარ შემთხვევაში არ უგულებელყონ საჰაერო განგაშის სიგნალები. „ძალიან გთხოვთ, თავს გაუფრთხილდით. გთხოვთ, აუცილებლად რეაგირებდეთ სარაკეტო საფრთხის ნიშნებზე და განგაშის დროს თავშესაფრებს შეაფაროთ თავი“, — განაცხადა პრეზიდენტმა.
ზელენსკის თქმით, უკრაინის უნარი, წარმატებით მოიგერიოს მტრის საჰაერო იერიშები, პირდაპირ არის დამოკიდებული საერთაშორისო პარტნიორების მხარდაჭერაზე. მისი განმარტებით, ფრონტის ხაზისა და მშვიდობიანი ქალაქების უსაფრთხოება დიდწილად განისაზღვრება იმით, თუ რამდენად სწრაფად მიაწვდიან მოკავშირეები ქვეყანას საჭირო შეიარაღებას.
„ძალიან ბევრი რამ არის დამოკიდებული მსოფლიოს თითოეულ ლიდერზე და იმ ქვეყნებზე, რომლებსაც აქვთ ჩვენთვის კრიტიკულად საჭირო თავდაცვითი საშუალებები. ახლა აუცილებელია მტკიცე პოლიტიკური ნების გამოვლენა, განსაკუთრებით ამერიკის შეერთებულ შტატებში, ევროპასა და ჩვენს სხვა პარტნიორებთან, რათა დროულად მივიღოთ საჰაერო თავდაცვის დამატებითი სისტემები“, — აღნიშნა უკრაინის ლიდერმა.
ამ დროისთვის უკრაინის საჰაერო თავდაცვის ძალები და საგანგებო სამსახურები სრულ მზადყოფნაშია მოყვანილი, რათა მტრის სავარაუდო იერიში მინიმალური დანაკარგებით იქნას მოგერიებული. ტექნიკური დეტალებისა და სამიზნეების შესახებ ინფორმაცია უსაფრთხოების მოტივით არ საჯაროვდება.