ოპოზიცია პროტესტისთვის ემზადება. 4 თებერვალს დილის 10:00 საათიდან, პარლამენტის სამივე შესასვლელს ოპოზიცია და სამოქალაქო აქტივისტები დაიკავებენ. ისინი სირცხვილის დერეფნების მოწყობას აპირებენ. ოპოზიციაში აცხადებენ, რომ ეს მხოლოდ გამაფრთხილებელი აქცია იქნება.
4 თებერვალს საპარლამენტო სესიაზე დასწრებას გეგმავენ დამოუკიდებელი დეპუტატები, რომლებმაც მმართველი პარტია, საარჩევნო სისტემის ჩაგდების გამო დატოვეს. „ქართული ოცნების” ყოფილი წევრები ამბობენ, რომ ყოფილ თანაგუნდელებს დემოკრატიის პრინციპის მნიშვნელობებს და დაპირების შესრულების აუცილებლობას, საპარლამენტო ტრიბუნიდან შეახსენებენ.
მმართველ გუნდში ფიქრობენ, რომ ოპოზიციის მიერ დაანონსებული აქცია უკანონოა, ისინი გეგმების შეცვლას არ აპირებენ და აცხადებენ, რომ ხელისუფლება საკმარის დათმობაზე წავიდა.
ხვალინდელ აქციას მოძრაობა „სირცხვილიას“ აქტივისტებიც უერთდებიან, მათი თქმით, ქვეყანაში პროპორციული არჩევნების ჩატარება აუცილებელია.
4 თებერვლის გამაფრთხილებელი აქციის შემდეგ პერმანენტულად აქციები, სხვადასხვა სახელმწიფო დაწესებულებასა და დიდ ქალაქებს მოიცავს.
