„ახალი საქართველოს სოციალური მიმართულების ხელმძღვანელი თეონა ჭალიძე, ჯანდაცვის მინისტრის ეკატერინე ტიკარაძის მედიის წარმომადგენლებთან ნათქვამ ფრაზას: მე ვიცი, რომ მინისტრი ვარ, არ მჭირდება შეხსენება, სოციალურ ქსელში გამოეხმაურა.
,,ეჭვიც არ მეპარება რომ ძალიან კარგად იცის მინისტრი რომაა. ემახსოვრება აბა რა?! ყველაზე ჯადოსნურ სიზმარშიც კი არ დაესიზმრებოდა ეკატერინე ტიკარაძეს რომ ჯანდაცვის მინისტრი გახდებოდა. არაკომპეტენტური რომაა კიდევ ერთხელ გამოაჩინა ამ მოკლე დროში.
ქალბატონო მინისტრო სოციალურად დაუცველ ადამიანებს სამ-სამი თვით რომ უჩერებთ დახმარებას და შიმშილისთვის იმეტებთ არ კითხულობთ რითი უნდა იარსებონ ამ ადამიანებმა? ნახევარი მილიონი ადამიანი რომ საარსებო შემწეობით არსებობს შემთხვევით ოცნების
ხელისუფლების ბრალი ხომ არაა?! 4 წლის ანასტასია დედას, რომ ეტყვის მშიაო, რა ქნას იმ დედამ გიფიქრიათ ამაზე? და რამდენ ბავშვს ტოვებთ ასე თვეობით? ვინც ბაღში დადის კიდე გაუმართლათ, მხოლოდ უვახშმოდ დაიძინებენ. მაგრამ რა ქნან სკოლის მოსწავლეებმა? განსაკუთრებით იმათმა ვინც არც უფასო სასადილოს სიაში არიან, ვისაც გაუმართლა და უფასო სასადილოს სიაში მოხვდა ის ერთ ულუფას მიიღებს დღეში 1,30 თეთრად გამზადებულს.
ერთხელ მაინც მიბრძანდით მინისტრო და გასინჯეთ უფასო სასადილოს საჭმელი, საკუთარ შვილს თუ გაიმეტებდით ასეთი კვებისთვის? არ გეკადრებათ?! არ გეხებათ?! აბა რა გეხებათ? ,,ახალი საქართველოს” სოციალური სამსახური ბოლო რამდენიმე თვის განმავლობაში ასობით ოჯახს გავესაუბრეთ ვისაც აბსურდული მიზეზებით შეუჩერეთ საარსებო შემწეობა.
ესაა სრულიად უპასუხისმგებლო და გულგრილი დამოკიდებულება მოქალაქეების მიმართ. მათ მიმართ ვისაც ყველაზე მეტად სჭირდებათ ზრუნვა და სოციალური დაცვა. ჩვენ არაერთხელ მივმართეთ ჯანდაცვის სამინისტროს, პარლამენტის ჯანდაცვის კომიტეტს რომ შეეცვალათ ეს არაადამიანური და არაჰუმანური მიდგომა და ოჯახებს გადამოწმებების პერიოდში არ შეუჩერონ დახმარება. მხოლოდ მაშინ შეუწყვიტონ მათ დახმარება, როცა გადამოწმების შედეგად დადგინდება, რომ ამა თუ იმ ოჯახის სოციალურ-ეკონომიკური მდგომარეობა გაუმჯობესდა. კედევ ერთხელ მოვითხოვთ შეცვალეთ ეს მავნე პრაქტიკა”- წერს „ახალი საქართველოს სოციალური მიმართულების ხელმძღვანელი.
