{{ARTICLEIMAGE}}
საქართველოს პრემიერ-მინისტრის მამუკა ბახტაძის განცხადებით, აჭარის მთავრობის თავმჯდომარე თორნიკე რიჟვაძე მაღალი პასუხისმგებლობის მქონე პოლიტიკოსია და თავისი კუთხისთვის 24 საათი მუშაობს.
მამუკა ბახტაძის თქმით, მან აჭარის ავტონომიურის რესპუბლიკის თავმჯდომარის თორნიკე რიჟვაძის მიერ გაკეთებული განცხადების შესახებ არ იცის.
“მე კონტექსტი არ ვიცი, რაზეც საუბრობთ, მაგრამ დარწმუნებული ვარ, რომ თორნიკე რიჟვაძე მსგავს განცხადებას არასდროს გააკეთებდა. ის ძალიან პასუხისმგებლიანი პოლიტიკოსია და დამერწმუნეთ, ის 24 საათი მუშაობს თავისი კუთხისთვის. მიუხედავად იმისა, რომ სულ რამდენიმე თვეა, ამ თანამდებობაზეა, მან აჭარასა და ბათუმს ძალიან მნიშვნელოვანი შედეგები მოუტანა. რაც შეეხება ამ კონტექსტს, მე ვფიქრობ, რომ ეს არასწორი ინტერპრეტაციის შედეგია”, თქვა პრემიერმა.
შეგახსენებთ, რომ აჭარის მთავრობის თავმჯდომარენ ოპოზიციის წარმომადგენლის მისამართით მკვეთრი განცხადება გააკეთა. თორნიკე რიჟვაძის განცხადებით, ის პირდაპირ იძიებს შურს, ვინც გაბედავს აჭარელი ხალხის ღირსების შეურაცხყოფას.
“ჩვენი ოპონენტების საქციელი, მათი განცხადებები უკვე ყოველგვარ ზღვარს სცდება. გუშინ თქვენ მოისმინეთ ქიქავებისა და სხვა ამ ტიპის სუბიექტების ყოვლად სამარცხვინო განცხადებები. ვაცხადებ, რომ პირადად ვიძიებ შურს ყველა ადამიანზე, რომელიც გაბედავს აჭარელი ხალხის ღირსების შეურაცხყოფას. ჩვენ მათ საკონტროლო დარტყმა გავუკეთეთ და პირობას ვდებ, რომ ამ პროცესს ბოლომდე მივიყვან და ყველა ეს ადამიანი ამ ველისგან გაიწმინდება”, თქვა თორნიკე რიჟვაძემ ვიდეომიმართვაში, რომელიც მისსავე სოციალურ ქსელში გავრცელდა.