უკრაინული შორს მოქმედი სანქციების გეოგრაფია დღეს რეკორდულ ნიშნულამდე გაიზარდა. უკრაინულმა დრონებმა ისტორიაში პირველად მიაღწიეს ფრონტის ხაზიდან 2500 კილომეტრის მოშორებით მდებარე ომსკის ნავთობგადამამუშავებელ ქარხანას. ადგილობრივი ხელისუფლების მცდელობის მიუხედავად, დაემალა შედეგები, სოციალურ ქსელებში გავრცელებული კადრები ადასტურებს, რომ რუსეთის უმსხვილეს საწარმოში, მინიმუმ ორი აფეთქების შემდეგ, მასშტაბური ხანძარი გაჩნდა.
უკრაინული მედია წერს, რომ ეს არის ბენზინის მწარმოებელი 11 უმსხვილესი რუსული საწარმოდან ბოლო, რომელსაც უკრაინელებმა დაარტყეს. ქარხანა, რომლის სიმძლავრეც წელიწადში 21 მილიონ ტონაზე მეტ ნავთობს შეადგენს, რუსეთის საოკუპაციო არმიის მომარაგებაშია ჩართული. წინასწარი ინფორმაციით, დაზიანებულია ნავთობის პირველადი გადამუშავების დანადგარი, რომლის სიმძლავრეც წელიწადში 8,4 მილიონ ტონას შეადგენს.
ომსკის ოლქის გუბერნატორმა, ვიტალი ხოცენკომ ჯერ უპილოტო საფრენი აპარატების საფრთხის შესახებ გამოაცხადა, შემდეგ კი საკუთარ ტელეგრამ არხზე დაწერა, რომ რეგიონში “მტრის დრონი ჩამოაგდეს”. მისი თქმით, რამდენიმე უპილოტო საფრენმა აპარატმა “შეძლო მიეღწიათ ომსკის ჩრდილოეთში მდებარე სამრეწველო კომპლექსამდე”.
უკრაინის გენშტაბმა მალევე დაადასტურა, რომ დრონებით იერიში მიიტანეს ომსკის ნავთობგადამამუშავებელზე, რომელიც უკრაინის საზღვრიდან 2 500 კილომეტრითაა დაშორებული. ცნობების მიხედვით, დაზიანდა ნავთობის გადამამუშავებელი დანადგარი. უკრაინული ტელეგრამ არხი Exilenova+ წერს, რომ განადგურებულია ორი გადამამუშავებელი დანადგარი.