2026 წლის 1 სექტემბრიდან ამოქმედდა საქართველოს მთავრობის 31 აგვისტოს დადგენილება, რომლითაც შეიცვალა 2023 წლის 29 დეკემბრის №543 დადგენილება „სამხედრო აღრიცხვის, წვევამდელთა ეროვნული სამხედრო სამსახურისა და სარეზერვო სამხედრო სამსახურის ორგანიზების წესის დამტკიცების შესახებ”. ცვლილების თანახმად, ჯარში გაწვევის შესახებ უწყება საიტზე ატვირთვიდან მე-7 დღეს ჩაითვლება ჩაბარებულად.
დადგენილების მიხედვით, თუ პირი უარს აცხადებს შეტყობინების ან უწყების პირადად ჩაბარებაზე, დოკუმენტზე კეთდება შესაბამისი აღნიშვნა და ის უბრუნდება სამხედრო გაწვევისა და რეკრუტირების ეროვნულ სააგენტოს — ასეთ შემთხვევაშიც უწყება ჩაბარებულად ითვლება. იგივე წესი მოქმედებს მაშინაც, თუ წვევამდელის ოჯახის სრულწლოვანი წევრი მიიღებს ან უარს იტყვის შეტყობინების მიღებაზე.
თუ უწყების ჩაბარება პირადად ან საკომუნიკაციო საშუალებებით (მათ შორის, sms-ით ან ელფოსტით) ვერ ხერხდება, ან 2 სამუშაო დღის განმავლობაში უკუკავშირი არ ხორციელდება, სააგენტო არაუგვიანეს მე-2 სამუშაო დღისა აქვეყნებს გამოძახების შესახებ შეტყობინებას საკუთარ ვებგვერდზე. ასეთ შემთხვევაში უწყება გამოქვეყნებიდან მე-7 კალენდარულ დღეს ჩაითვლება ჩაბარებულად, რის შემდეგაც პირი ვალდებულია 10 კალენდარული დღის ვადაში გამოცხადდეს სააგენტოს შესაბამის სტრუქტურულ ქვედანაყოფში.
დოკუმენტის მიხედვით, წვევამდელთა გამწვევ კომისიაზე გამოძახება ხდება თანმიმდვრობით: ჯერ ტექნიკური საშუალებით (მათ შორის, sms), შემდეგ პირადად ჩაბარებით მისამართზე (რეგისტრაციის, ფაქტობრივი საცხოვრებელი ან სამუშაო ადგილი), ხოლო ბოლო ეტაპზე — საჯარო გამოქვეყნებით.
თუ წვევამდელი გამწვევ კომისიაზე ან სამედიცინო შემოწმებაზე არ გამოცხადდება, 5 სამუშაო დღეში დგება ადმინისტრაციული სამართალდარღვევის ოქმი, რომელიც დაუყოვნებლივ ეგზავნება სასამართლოს. სამხედრო სამსახურის გასავლელად გამოუცხადებლობის შემთხვევაში სააგენტო მასალებს გადასცემს სამართალდამცავ ორგანოებს.
დადგენილება ითვალისწინებს გამოუცხადებლობის საპატიო მიზეზებსაც: ჩასარიცხად გამოუცხადებლობის შემთხვევაში — ახლო ნათესავის გარდაცვალება ან დაუძლეველი გარემოება; სამედიცინო კომისიაზე გამოუცხადებლობისას — ასევე ავადმყოფობა, დადასტურებული სამედიცინო დაწესებულების მიერ.
ცვლილებების შეტანის შესახებ საქართველოს პარლამენტმა თავდაცვის კოდექსში აპრილში განაცხადა.