ნატოს ქვეყნებმა ალიანსის ისტორიაში პირველად ჩაატარეს სამხედრო წვრთნები აშშ-ის მონაწილეობის გარეშე, — ამის შესახებ Politico-მ შაბათს, 5 სექტემბერს, დაწერა. ყოველწლიური წვრთნები Northern Viking 21 აგვისტოდან 4 სექტემბრამდე ისლანდიის სანაპიროებთან მიმდინარეობდა. მონაწილეები რუსული წყალქვეშა ნავების აღმოჩენასა და განადგურებას ამუშავებდნენ.
აშშ-ის თავდაცვის სამინისტროსა და თეთრ სახლს ამ დროისთვის კომენტარი არ გაუკეთებიათ. წელს წვრთნებში, სხვებთან ერთად, მონაწილეობდნენ გერმანიის საჰაერო ძალების სადაზვერვო თვითმფრინავები, ბელგიური გამანადგურებლები და კანადური სამხედრო ხომალდები.
წინა ათწლეულების განმავლობაში ამ მანევრებს შეერთებული შტატები ხელმძღვანელობდა, წელს კი ამერიკელებმა მხოლოდ დაგეგმვაში მიიღეს მონაწილეობა და კეფლავიკის აეროპორტის სამხედრო ნაწილში ახალი ობიექტები ააშენეს.
„სწორედ ასეთ წვრთნებზე ეფუძნება ჩრდილოეთ ატლანტიკაში მუდმივი ყოფნა“, — განაცხადა ნატოს ოფიციალურმა წარმომადგენელმა ტიმოთი პიეტრაკმა.
„ეს ადასტურებს, რომ ნატო მზად არის დაიცვას მოკავშირეთა ტერიტორიის ყოველი გოჯი და იმოქმედოს იქ, სადაც ამას ალიანსის უსაფრთხოება მოითხოვს“, — დასძინა მან.
აშშ ევროპაში სამხედრო კონტინგენტის საკითხს გადახედავს
მაისში ნატოს გაერთიანებული შეიარაღებული ძალების მთავარსარდალმა ევროპაში, აშშ-ის საჰაერო ძალების გენერალ-ლეიტენანტმა ალექსუს გრინკევიჩმა განაცხადა, რომ ევროპული სამხედრო შესაძლებლობების გაძლიერების ფონზე, „გრძელვადიან პერსპექტივაში“ მოსალოდნელია ამერიკული ძალების ნაწილის მსოფლიოს სხვა რეგიონებში გადაყვანა. მისი თქმით, ეს მრავალწლიანი პროცესი იქნება.
ივლისში აშშ-ის თავდაცვის მდივნის მოადგილემ სამხედრო-პოლიტიკურ საკითხებში ელბრიჯ კოლბიმ განაცხადა, რომ პენტაგონი ევროპაში ამერიკული სამხედრო კონტინგენტის საკითხს გადახედავს.
კოლბის თქმით, ამის შედეგად „ნატო სწრაფად და გარდაუვლად წავა იმ მიმართულებით, რომ ევროპამ საკუთარი თავდაცვის ძირითად პასუხისმგებლობა თავად იტვირთოს, არაბირთვული შეიარაღების გამოყენებით“.