“უწყების ცნობით, გიორგი ფეიქრიშვილმა მოქალაქე თბილისში მდებარე საცხოვრებელ სახლში მიიყვანა, სადაც მას ე.წ. კრიმინალური მფარველობის სანაცვლოდ დიდი ოდენობით თანხის გადახდა მოსთხოვა, წინააღმდეგ შემთხვევაში კი სიცოცხლის მოსპობით დაემუქრა.” – შინაგან საქმეთა სამინისტრო ძმებ დავით და გიორგი ფეიქრიშვილების დაკავებასთან დაკავშირებით განცხადებას ავრცელებს.
“თბილისის პოლიციის დეპარტამენტის თანამშრომლებმა, ორ სხვადასხვა სისხლის სამართლის საქმეზე ჩატარებული ოპერატიული ღონისძიებებისა და საგამოძიებო მოქმედებების შედეგად, ჯგუფურად ჩადენილი ძალადობისა და გამოძალვის ბრალდებით სამი პირი – წარსულში მრავალჯერ ნასამართლევი 1986 წელს დაბადებული ძმები – გიორგი და დავით ფეიქრიშვილები, ასევე 1983 წელს დაბადებული კიდევ ერთი პირი დააკავეს.
გამოძიებით დადგინდა, რომ გიორგი ფეიქრიშვილმა, მოქალაქე თბილისში მდებარე საცხოვრებელ სახლში მიიყვანა, სადაც მას ე.წ. კრიმინალური მფარველობის სანაცვლოდ დიდი ოდენობით თანხის გადახდა მოსთხოვა, წინააღმდეგ შემთხვევაში კი სიცოცხლის მოსპობით დაემუქრა. სამართალდამცველებმა ბრალდებული პირი თბილისში დააკავეს.
რაც შეეხება მეორე სისხლის სამართლის საქმეს, საგამოძიებო მოქმედებებით დადგინდა, რომ თბილისში, ურთიერთშელაპარაკების ნიადაგზე, დავით ფეიქრიშვილმა და მისმა პირადმა დაცვამ ჯგუფურად იძალადეს ახალგაზრდა მამაკაცზე.
ჩატარებული ოპერატიული ღონისძიებებისა და საგამოძიებო მოქმედებების შედეგად, სამართალდამცველებმა ორივე პირი დააკავეს.
გამოძიება საქართველოს სისხლის სამართლის კოდექსის 181-ე და 126-ე მუხლებით მიმდინარეობს”. – წერია გავრცელებულ ინფორმაციაში.
ძმები ფეიქრიშვილები, რომლებსაც „ტყუპების“ სახელით იცნობენ, წარსულში მრავალჯერ არიან ნასამართლევი და მათი სახელი არაერთ გახმაურებულ კრიმინალურ საქმესა და გარჩევას უკავშირდება.
საგამოძიებო მედიასა და პოლიტიკურ წრეებში ღიად საუბრობდნენ იმაზე, რომ ძმები წლების განმავლობაში სარგებლობდნენ ოთარ ფარცხალაძის გავლენებითა და გარკვეული სახის მფარველობით, რაც მათ ხელშეუხებლობას უზრუნველყოფდა.
დავით ფეიქრიშვილის სახელს უკავშირდება დედაქალაქის ცენტრიდან 2 მილიონი ლარის გატაცება, რაც მედიაში „საუკუნის ძარცვის“ სახელით გახდა ცნობილი. გამოძიების ვერსიით, ფეიქრიშვილი ამ მასშტაბური დანაშაულის უშუალო ორგანიზატორი იყო.
ტყუპი ძმების გვარი ფიგურირებდა ვაკეში, სოსო ჯოხაძის მკვლელობის საქმეში.
დავით ფეიქრიშვილის წარსულიდან ერთ-ერთი ყველაზე ცნობილი ეპიზოდი 2010 წლის ე.წ. „მაზავშიკების საქმეა“. საქმის მასალების მიხედვით, ფეიქრიშვილმა საფეხბურთო ფსონების (ე.წ. „მაზის“) მეშვეობით 140 000 აშშ დოლარი მოიგო. წაგებულმა მხარემ ვალის გადახდა ვერ შეძლო, რის გამოც საქმეში კრიმინალური ავტორიტეტი ვახტანგ (ვატო) ყიფიანი ჩაერთო, რომელიც პროცესებს უკრაინიდან მართავდა. საბოლოოდ, ფეიქრიშვილისთვის თანხის ნაწილის გადასაცემად მისული ცნობილი ფეხბურთელი გიორგი დემეტრაძე, დავით გაგნიძე და კახა მისირელი პოლიციამ დააკავა, დავით ფეიქრიშვილმა კი პროკურატურასთან საპროცესო შეთანხმება გააფორმა და პატიმრობას თავი მალევე დააღწია.