მსჯავრდებული გიორგი დავითაძე უარს ამბობს საავადმყოფოში გადაყვანაზე მას შემდეგ, რაც დედის – ირმა დავითაძის თქმით, 3 ცალი მეტალის ნივთი გადაყლაპა.
როგორც დედა ამბობს, გიორგი დავითაძემ, სავარაუდოდ, მასზე განხორციელებული ზეწოლის გამო, პროტესტის ნიშნად უცხო საგანი გადაყლაპა. ამის შესახებ დავითაძის დედამ წუხელ რუსთავის მეექვსე პენიტენციურ დაწესებულებასთან განაცხადა.
“სავარაუდოდ, მასზე განხორცირლდა ზეწოლა ჩვენი აქტივობის გამო. მან პროტესტის ნიშნად გადაყლაპა უცხო საგანი, რის გამოც ჩემი შვილის მდგომარეობა არის ცუდად. სასწრაფოდ მიიღეთ ზომები, ჩემს შვილს რამე არ დაემართოს. ბრძოლას არ შევწყვეტ!”, – განაცხადა ირმა დავითაძემ.
მან ჯერჯერობით არ იცის, როგორია მისი შვილის მდგომარეობა. წუხანდელი ინფორმაციით, რომელიც ციხიდან სახალხო დამცველის წარმომადგენელმა გამოიტანა, მსჯავრდებულის ჯანმრთელობის მდგომარეობა დამაკმაყოფილებელი იყო.
დედის ინფორმაციით, მისი შვილი ამბობს, რომ სამედიცინო დაწესებულებაში იქამდე არ გადავა, ვიდრე დეესკალაციის ოთახიდან საკნებში არ დააბრუნებენ იმ პატიმრებს, რომლებმაც მას თანადგომა გამოუცხადეს და პროტესტი გამოხატეს მას შემდეგ, რაც მისმა შვილმა ციხის ბადრაგი სექსუალურ ძალადობაში დაადანაშაულა. ირმა დავითაძე ამბობს, რომ იყო ე.წ. შუმოკი და სწორედ ამის გამო ციხის ადმინისტრაციამ ისინი დეესკალაციის ოთახში გადაიყვანა.
„გიორგი ამას აპროტესტებს და ამბობს, რომ ვიდრე პატიმრებს საკნებში არ დააბრუნებენ, არ მიიღებს სამედიცინო დახმარებას. მან შიმშილობა დაიწყო ამასთან დაკავშირებით“, – განაცხადა ირმა დავითაძემ, რომელიც იმედს გამოთქვამს, რომ მისი შვილის მდგომარეობა არ დამძიმდება.
პენიტენციურმა სამსახურის ინფორმაციით პატიმარმა დავითაძემ პენიტენციური დაწესებულების ადმინისტრაციის თანამშრომლის თვალწინ, სამეთვალყურეო ვიდეოკამერის დასანახად, დემონსტრაციულად, გადაყლაპა გაურკვეველი მცირე საგანი, რის შემდეგაც მას კლინიკა „ვივამედში“ შესთავაზეს გადაყვანა, თუმცა დავითაძემ კლიიკაში გადაყვანაზე უარი თქვა.
შეგახსენებთ, რუსთავის მე-6 პენიტენციური დაწესებულების მსჯავრდებულმა გიორგი დავითაძემ ციხის ბადრაგი გაუპატიურებაში დაადანაშაულა. პენიტენციურმა სამსახურმა ეს ბრალდება კატეგორიულად უარყო და დასტურად ვიდეო გაავრცელა. თუმცა, აღნიშნულმა ვიდეომასალამ საზოგადოების ნაწილსა და არასამთავრობო ორგანიზაციებში კიდევ უფრო მეტი კითხვა გააჩინა.