დღეს ევროპარლამენტის სესიაზე ევროდეპუტატები დემოკრატიისა და ადამიანის უფლებების კრიტიკულ დარღვევებს განიხილავენ. დღის წესრიგშია საქართველოში მმართველი გუნდის მიერ ოპოზიციური სპექტრის აკრძალვის მცდელობების საკითხზე მსჯელობა.
დღევანდელი დებატების შემდეგ, ხვალ 8 ოქტომბერს ევროპარლამენტი რეზოლუციას მიიღებს. სხვადასხვა პოლიტიკური ფრაქციის მიერ სულ 7 რეზოლუციის პროექტია წარდგენილი, რომელტა აბსოლუტური უმრავლესობა გმობს ოპოზიციის გაუქმების მცდელობას და პერსონალურ სანქციებს ითხოვს. მათ შორის ევროპის სახალხო პარტიის პროექტში პირდაპირ, სახელითა და გვარითაა მოთხოვნილი სანქციების დაწესება ივანიშვილის, კობახიძის, პაპუაშვილისა და კალაძის წინააღმდეგ.
„ევროპარლამენტი სინანულს გამოთქვამს ევროკავშირისა და წევრი ქვეყნების უმრავლესობის მხრიდან მუდმივი უმოქმედობის გამო, რათა უზრუნველყოფილ იქნას ხელშესახები შედეგები საქართველოში მუდმივად გაუარესებულ მდგომარეობაზე; კვლავ იმეორებს თავის მოწოდებას მიზანმიმართული სანქციების დაწესების შესახებ დემოკრატიულ უკუსვლასა და პოლიტიკურ დევნაზე პასუხისმგებელ პირთა მიმართ, პირველ რიგში და უპირველეს ყოვლისა, ბიძინა ივანიშვილის, ირაკლი კობახიძის, შალვა პაპუაშვილისა და კახა კალაძის წინააღმდეგ“ – ნათქვამია ევროპის სახალხო პარტიის რეზოლუციის პროექტში.
დებატებამდე, საქართველოსთან დაკავშირებით დღეს საგარეო საქმეთა კომიტეტის სხდომაზე, პოლონელმა ევროპარლამენტარმა კშიშტოფ ბრეიზამ პირდაპირ დაუსვა კითხვა ევროკომისარ მარტა კოსს – დიპლომატიური და ოფიციალური პასპორტების მფლობელებისთვის უვიზო მიმოსვლის შეჩერების გარდა, რომელიც არაეფექტურია, განიხილავს თუ არა კომისია უვიზო რეჟიმის უფრო ფართო შეჩერებას და არსებობს თუ არა საბჭოში მიზანმიმართულ სანქციებზე შეთანხმების რეალური შანსი, – რაზეც მარტა კოსმა განაცხადა, რომ საქართველოსთან მიმართებით მხოლოდ იმის გაკეთებაა შესაძლებელი, რასაც ევროკავშირის წევრ სახელმწიფოები გადაწყვეტენ
„ჩვენ გვექნება კონკრეტული დისკუსია საქართველოსთან დაკავშირებით ევროკავშირის საგარეო საქმეთა საბჭოში მომავალ კვირას. ჩვენ შეგვიძლია მხოლოდ იმდენის გაკეთება, რამდენის გაკეთებაც წევრ სახელმწიფოებს სურთ“ – განაცხადა ევროკომისარმა კოსმა.
ევროპარლამენტში დაგეგმილ დებატებს ტრადიციული კომენტარით გამოეხმაურა შალვა პაპუაშვილი და განაცხადა, რომ სტრასბურგში დღეს ის „უცხო ძალები“ იდებატებენ, ვინც ფარულად აფინანსებს ოპოზიციას, რათა საკუთარი დღის წესრიგი განახორციელოდ
„თავისთავად ისინი დებატობენ, ვის ხელშიც ოპოზიციური პარტიები იარაღები არიან საქართველოს წინააღმდეგ ბრძოლაში – „იუკნევიჩიანები” და მსგავსი უცხო ძალები, რომლებიც იყენებენ და ფარულად აფინანსებენ ამ პარტიებს, რა თქმა უნდა, მათ დებატები ექნებათ“ – თქვა შალვა პაპუაშვილმა.
ნიშანდობლივია ის კონტექსტიც, რომელშიც საქართველო ევროპარლამენტის დღის წესრიგში მოხვდა. თბილისში ოპოზიციური სპექტრის შესაძლო აკრძალვისა და დემოკრატიის უკუსვლის საკითხს ევროპელი კანონმდებლები იმ გადაუდებელი რეზოლუციების ბლოკში განიხილავენ, რომელიც ირანში მიმდინარე სასტიკ რეპრესიებსა და აზერბაიჯანში პოლიტიკური პატიმრების დევნას შეეხება.