სამხრეთ აფრიკის სატყეო, თევზჭერისა და გარემოს დაცვის დეპარტამენტმა (DFFE) სისხლის სამართლის საქმე აღძრა ექსპორტიორის წინააღმდეგ, რომელიც ლიმპოპოს პროვინციიდან საქართველოში 5 გიგანტური ბაობაბის ხის გადაზიდვას გეგმავდა. უწყება გამოძიების ინტერესებიდან გამომდინარე ექსპორტიორის ვინაობას ჯერ არ ასახელებს.
სამხრეთაფრიკული საგამოძიებო გამოცემა Daily Maverick აღნიშნავს, რომ სისხლის სამართლის პასუხისმგებლობის საკითხი მას შემდეგ დადგა, რაც დურბანის ოფიციალურმა პირებმა სპეციალურად დაცული ბაობაბის რამდენიმე ხის გადაზიდვა შეაჩერეს, რომლებიც ოფიციალური დოკუმენტებით საქართველოში, სავარაუდოდ, „გამწვანების პროექტისთვის“ იყო განკუთვნილი.
ბაობაბის უნებართვო მოპოვება ქვეყანაში პირველი კატეგორიის დანაშაულია და 3 წლამდე პატიმრობას ითვალისწინებს.
საუკუნოვანი ხეები ამჟამად დურბანში, Africa Global Logistics-ის (AGL) საწყობშია დაყადაღებული. Daily Maverick-ის ინფორმაციით, სამართლებრივი დარღვევები და ქრონოლოგია ასეთია:
2026 წლის 17 ივლისს, როდესაც სამართალდამცველებმა ხეები საწყობში შეამოწმეს, ექსპორტიორმა ვერ წარადგინა კანონიერი ლიცენზია, რომელიც მას დაცული სახეობის ამოთხრის, ფლობის, ტრანსპორტირებისა და ექსპორტის უფლებას მისცემდა.
მას შემდეგ, რაც ხეები დაუყადაღეს, ექსპორტიორმა 27 ივლისს დეპარტამენტში შეიტანა განაცხადი ლიცენზიის მისაღებად, რათა უკვე ჩადენილი ქმედება წარსული თარიღით დაეკანონებინა.
დეპარტამენტმა 31 ივლისს მოთხოვნა ოფიციალურად უარყო და განმარტა, რომ ვინაიდან საქმეზე სისხლის სამართლის გამოძიება მიმდინარეობს, უწყება არ გასცემს ლიცენზიას პოსტფაქტუმ, რათა სავარაუდო კრიმინალურ ქმედებას კანონიერი სახე მისცეს. ექსპორტიორმა გადაწყვეტილება 8 აგვისტოს გაასაჩივრა და დავა ამჟამად სააპელაციო ადმინისტრატორთან მიმდინარეობს.
საწყობის მფლობელი კომპანია AGL აცხადებს, რომ ისინი მხოლოდ ლოგისტიკური სერვისის მომწოდებლები არიან, არ ფლობენ ნებართვას, არ მონაწილეობდნენ ხეების ამოთხრაში და მათ წინააღმდეგ სისხლის სამართლის ბრალდება არ არსებობს.
ბაობაბის ფონდის დამფუძნებლის, სარა ვენტერის განცხადებით, საქართველოს ამ ხეების სიცოცხლის შენარჩუნების ძალიან ცუდი გამოცდილება აქვს.
საქართველოში აფრიკული ბაობაბების იმპორტის ერთადერთი პრეცედენტი 2022-2023 წლებს უკავშირდება, როდესაც მილიარდერ ბიძინა ივანიშვილის მიერ დაარსებული შეკვეთილის დენდროლოგიური პარკისთვის კენიიდან 8 ძირი ბაობაბის ხე ჩამოიტანეს.
2024 წელს დენდროლოგიურმა პარკმა ოფიციალურად განაცხადა, რომ კენიიდან ჩამოტანილი რვაბევე ბაობაბის ხე გადარგვიდან 6-7 თვეში გახმა.