4 ოქტომბრის მოვლენების საქმეზე მსჯავრდებულმა ნანა სანდერმა საპატიმრო დატოვა.მას საპროცესო შეთანხმება 2 ნოემბერს გაუფორმდა და სასჯელის სახით განესაზღვრა 1 წლითა და 1 თვით თავისუფლების აღკვეთა და 2-წლიანი პირობითი მსჯავრი.
„კარგია გარეთ ყოფნა, მაგრამ მე არ ვიმყოფები ახლა თავისუფალი ქვეყნის ტერიტორიაზე და ჩემი გათავისუფლებით არ გათავისუფლებულა საქართველო და არ გათავისუფლებულა ასევე უამრავი სხვა პოლიტპატიმარი.
რა თქმა უნდა მიხარია, მაგრამ საზეიმო ნამდვილად არაფერი მაქვს იმიტომ, რომ რა მდგომარეობაში თუნდაც ვტოვებ სხვა პატიმრებს იქნებიან ეს პოლიტპატიმრები, სინდისის პატიმრები თუ რიგითი პატიმრები…
რა თქმა უნდა [საპროცესოს გაფორმებით] დედაჩემისთვის და ჩემი ოჯახისთვის სწორი გადაწყვეტილება მივიღე. ასე ვთვლი, რადგან ჩემი ოჯახის მიმართაც გამაჩნია პასუხისმგებლობა პირველ რიგში და შემდეგ უკვე ქვეყნის წინაშე…“, – თქვა 4 ოქტომბრის საქმეზე მსჯავრდებულმა ნანა სანდერმა პენიტენციური დაწესებულების დატოვების შემდეგ.
თბილისის საქალაქო სასამართლომ ნანა სანდერს 7 წლით თავისუფლების აღკვეთა 24 ივნისს მიუსაჯა. მას ბრალი ორი მუხლით ჰქონდა წარდგენილი: ჯგუფური ძალადობის ორგანიზება და მოწოდება სახელმწიფო ხელისუფლების დამხობისკენ.