ფინეთი რუსეთის მოქალაქეებისთვის ქვეყანაში შესვლის წესების გამკაცრების შესაძლებლობას განიხილავს და არც სრულ აკრძალვას გამორიცხავს. ახალი დისკუსიის საბაბი ლოზანის სასამართლოს გადაწყვეტილება გახდა, რომლითაც რუს ჰოკეისტებს საერთაშორისო ტურნირებში მონაწილეობის უფლება მიეცათ.პრემიერ-მინისტრმა პეტერი ორპომ პარასკევს, 6 ნოემბერს, რუსეთის მოქალაქეებისთვის ქვეყანაში შესვლის სრული აკრძალვის შესაძლებლობა არ გამორიცხა. ეს „თანმიმდევრული გადაწყვეტილება“ იქნებოდა, განუცხადა მან ჟურნალისტებს მთავრობის საგარეო და უსაფრთხოების პოლიტიკის კომიტეტის სხდომის შემდეგ.
რუს სპორტსმენებს შესაძლოა ფინეთში შესვლაზე უარი უთხრან
ორპომ შეახსენა საზოგადოებას, რომ ფინეთი რუსეთის მოქალაქეების ქვეყანაში შესვლას 2022 წლიდან, უკრაინაში რუსეთის სრულმასშტაბიანი შეჭრის დაწყების შემდეგ ზღუდავს. სხვა ზომებთან ერთად, ჰელსინკის ხელისუფლებამ რუსეთის მოქალაქეებისთვის ტურისტული ვიზების გაცემა შეწყვიტა. „ახლა გვინდა, გვქონდეს შესაძლებლობა, ქვეყანაში შესვლაზე უარი პროფესიონალ სპორტსმენებსაც ვუთხრათ“, — ციტირებს მის განცხადებას ფინეთის საზოგადოებრივი მაუწყებელი Yle.
თავის მხრივ, საგარეო საქმეთა მინისტრმა ელინა ვალტონენმა სოციალურ ქსელ X-ში დაწერა, რომ მისი უწყება მოკლე ვადაში მოამზადებს ცვლილებებს მთავრობის ადრინდელ გადაწყვეტილებაში, რომელიც რუსეთის მოქალაქეების ქვეყანაში შესვლას ეხება. „რუსეთმა უკრაინაში თავისი დაპყრობითი ომი უნდა შეწყვიტოს“, — დასძინა მან.
Yle იუწყება, რომ ნოემბრის შუა რიცხვებში ჰელსინკიში ჰოკეის ეროვნული ლიგის (NHL) ორი მატჩი გაიმართება, რომლებშიც რუსმა ჰოკეისტებმაც უნდა მიიღონ მონაწილეობა. ამის შემდეგ ფინეთის დედაქალაქში ფიგურულ სრიალში ტურნირი Finlandia Trophy ჩატარდება, რომელშიც მონაწილეობას რუსეთის წარმომადგენლებიც გეგმავენ. ნოემბრის ბოლოს კი ჩრდილოეთ ფინეთში, სამთო-სათხილამურო კურორტ რუკაზე, თხილამურებით რბოლაში მსოფლიო თასის ეტაპი გაიმართება, რომელზე დასასწრებადაც რუსი სპორტსმენები ჩასვლას აპირებენ.
ლოზანის სასამართლომ რუსეთის ჰოკეის ნაკრებების საერთაშორისო ტურნირებზე დაშვება მოითხოვა
ევროპის ქვეყნებში რუსეთის მოქალაქეების შესვლის შესახებ დისკუსიები, უკრაინის წინააღმდეგ რუსეთის მიმდინარე სრულმასშტაბიანი ომის ფონზე, კვლავ გამწვავდა ლოზანის სპორტული საარბიტრაჟო სასამართლოს (CAS) გადაწყვეტილების შემდეგ. ოქტომბრის ბოლოს სასამართლომ ყინულის ჰოკეის საერთაშორისო ფედერაციას (IIHF) რუსეთის ნაკრებების საერთაშორისო ტურნირებზე დაშვება დაავალა. ამის შემდეგ IIHF-მა გადაწყვეტილებასთან დაკავშირებით უთანხმოება გამოხატა და მიუთითა ვიზების მიღების, უსაფრთხოების უზრუნველყოფის, ლოგისტიკისა და მოკლე ვადებში შეჯიბრებების ფორმატის შეცვლის პრობლემებზე.
გარდა ამისა, ევროპის ექვსი ქვეყნის — დანიის, ლატვიის, ნორვეგიის, ფინეთის, ჩეხეთისა და შვედეთის — ნაკრებებმა მომავალ მსოფლიო ჩემპიონატზე რუსეთის ნაკრებთან თამაშზე უარი განაცხადეს. CAS-ის გადაწყვეტილებით უკმაყოფილება გერმანიის ჰოკეის კავშირმაც (DEB) გამოთქვა.
„ეს გადაწყვეტილება ძირეულად ცვლის ვითარებას გერმანიაში გასამართი 2027 წლის ჰოკეის მსოფლიო ჩემპიონატის გარშემო. რუსეთის მონაწილეობაზე დაშვებას ჩვენთვის, როგორც მასპინძელი მხარისთვის, მნიშვნელოვანი შედეგები მოჰყვება უსაფრთხოების, პოლიტიკისა და ეკონომიკის სფეროებში“, — განაცხადეს გერმანიის ჰოკეის კავშირში.